Wake up!(2)

先多謝仲有三位朋友過黎捧場!

---------------------------------------

我想再講下職場既野先。

薯仔之前提過話唔想自己實際上係做乜，因為行頭太窄，如果係同行就有可能知道薯仔真身係邊個。

為左增強呢篇blog既說服力，薯仔可以講，其實薯仔係做緊中環某種既"professional service"。

所謂professional，即係我識你唔識(eg醫生，律師，水喉佬etc)，咁我收得既錢，除左我既勞力外，仲有既係知識。

講話service，就即係唔同trading，個客係唔知我地個cost，asymmetric information比較嚴重。

------------------------------------

薯仔入黎間公司時，佢地間接同我講過employment既意義。。我地係employee，即係我地係收錢去做一d我地唔想去做既事。

薯仔做既工種，表明風光，做present，開會時個個睇落去都係一表人才，喳benz，搵阿二。。。

但係，我成日都掛一句話係口邊。。如果真係咁好做，就大把人做啦，幾時輪到我？

君不見今時今日既醫生，當年入醫要差唔多科科A，但係以家出黎可能做既就係係一間連鎖式醫務所，一日睇幾十個傷風感冒，以家睇返轉頭，佢地搵既錢應該唔夠當年佢地從商既同學多。

我唔係話唔尊敬做醫生呢種職業，甚至我覺得佢地好叻。。呢篇既角度淨係講錢。

做得越耐，發覺做一行，除非你係自己做生意有D細既幫你搵錢，否則就一定要做大行(做地產，唔通有新紅雞唔做做UNLISTED既，有匯豐唔做做創興)。

薯仔有呢種感覺，係因為薯仔做既professional service，都有一定數目既同行。有時薯仔同d客講數話要收幾錢時，佢地都會用其他同行既fee proposal去壓薯仔價。由於薯仔做既公司係同行中既名聲都有數一數二，咁收得既價都係數一數二。

最誇張既一次，係有一次個客覆返薯仔既proposal時，佢話我地個價貴過本地公司一百倍! (貴十倍八倍就周時都係，貴一百倍就係第一次聽) 正當薯仔以為呢單生意唔洗做時，佢地竟然又肯用返我地!

所以，人係犯賤既，如果自己對某樣野乜都唔識，係貴好過平既情況之下，如果資源容許就通常都揀個貴既。

講到呢度，就可以見到公司既名氣同盈利能力掛勾，其實薯仔做既野同果間本地無名氣既公司唔會爭太遠，但係就可以收多人地一百倍既價錢。

咁係咪話，薯仔會好嘆？當然唔係啦! 如果我收既錢同付出唔成正比，就即係我overpaid，一份工overpaid，就自然會多人爭，咁薯仔人工都唔慌高。。。。

收得人地呢個價錢，就自己要比人地睇到我地最"professional"既一面。平時傾野時當然要表現到好似好competent咁，開會時西裝骨骨精神奕奕(實際薯仔諗緊陣間lunch食乜)，甚至乎如果個客係煩時，更加要拋出一d我識佢唔識既野去等佢地收聲。

就好似睇醫生咁。你睇個街口八十蚊既，你就預左佢睇得求其。去養和就自然唔同d。

下個blog再講下薯仔點樣睇落去似值咁貴。