2007年6月19日 星期二

公務員

前排公務員大加薪,大致上社會既聲音係 1)政府班人又亂洗錢係班唔做野既公務員身上,同2)2001年入去既公務員好唔抵。

2)呢一點,薯仔唔係公務員,亦都唔知實況係點樣,所以唔加評論。薯仔想講既係,第一點。

---------------------

薯仔呢一行,其實同政府裡某一行工種好相似,而有一部份薯仔既同事亦因此投入政府既懷抱。

先講下如果唔做薯仔呢間公司,做政府既話,有乜好處:-
1) 極之準時放工
2) 禮拜六日一定唔洗返工
3)無甚deadline 壓力
4) 無工作表現落後既壓力 - 皆因年年係咪都會跳一個point。
5) 以薯仔既年資,一入去果下既人工,係會比現職既高。

可能以上既條例太吸引,所以政府話cut開支時,呢份工一路都係contract base但係都唔愁無人報。薯仔前排做到谷鬼氣時,亦都試過報政府呢一份工,而政府都比左個offer薯仔(果陣轉返做公務員),但係薯仔諗左好耐,結果都係留起以家既公司,因為。。。。。

1) 政府入面太多規條,同薯仔既性格唔多夾
2) 只要薯仔肯捱多一年,份人工已經高過政府所offer既唔少
3)政府又無bonus又無double pay
4) 咁細個就入政府,我都驚自己以後再唔適應commercial既生活

-------------------------------

政府呢一個部門,佢想請返一d 精英,所以之前政府一話可以某部份開返公務員既post時,佢都好快咁用"公務員"去請人。

但係奈何,唔好話係合約制,即使係長工,佢未加人工前既成效都係一般,好大程度係因為佢本身想請份cv靚既人,無咁好睇既又唔肯比offer,但係份cv靚d既又會覺得佢份人工係偏低。

之前既一次recruitment,薯仔從一個朋友得知,呢個部門請人係頗失敗,有四分一到三分一既candidate係reject佢個offer,都係不外乎佢想請人既同時,如薯仔咁既公司係依然會大幅度加薪咁去留人。細公司出黎既唔肯請,大公司出黎既佢比既條件又唔夠。。。。

好喇,以家終於放風出黎,話會大幅度加薪。。。。我睇返個salary level,大幅度加薪後係幾吸引,如果呢樣野係一年前比薯仔既話,薯仔可能都會受,但係我諗等得佢比垃圾會通過,又要等返一年半載,果陣出面又會再次加人工,咁政府呢個salary,好可能只可以吸引到一d好green既人又或者係commercial發展得唔如意既人。。。

---------------

事情咁又要諗返去。。。。政府有無需要係請社會上咁頂級既人才?

呢個就要在乎份工重唔重要喇,如金管局,我地係要請返一d勁人去睇住。而薯仔之前所講既部門,薯仔覺得即使唔需要請最勁既人,但係都要請返upper quartile既人,咁政府先唔會蝕底。

-------------------------------

或者政府既人工對如低技術既人黎講係高,但係對一d高技術既人,點講都仲係偏低(well,對於坐得最高既,如受千幾萬一年既任總,薯仔暫且保留評價),政府都仲係好難同其他大公司去爭人。

咁各位朋友,仲覺得政府既人工係咪over estimate?

4 則留言:

匿名 提到...

你講得好啱,因政策所限,政府跟本無可能同出面市場爭人。我諗政府今次唔係純粹為o左爭人,講不上穩定軍心,只可講做緩兵之計,希望減少員工流失。其實應該有其他理由,不過今日講住咁多先。

Justin 提到...

事情咁又要諗返去。。。。政府有無需要係請社會上咁頂級既人才?

呢個,我反而覺得,政府請一些好勁既人,目的就係避免這些頂級既人在社會裏搞事,事事與政府對著幹。

匿名 提到...

你可見到近日的新聞-護理員請願、教師遊行、地政主任抗議、和伊院通波仔事件等等,其實政府係正面對一個由內部引發的行政危機,正面對一個在梁錦松財政司司長任內所埋下的一個計時炸彈。

追朔梁錦松在任期間,以精簡架構為理由大幅裁減人手,要求長奉公務員自動離職(肥雞餐)。但為了維持政府運作,卻同時以低於市價和合約型式聘用已離職或新入職員工。以此掩眼法,短期內營造一個精簡架構的假象。

當經濟未見起色,這批合約公務員還和政府共渡時間。但當經濟好轉,沒有長奉枷鎖的合約公務員都放棄續約,紛紛轉投私人公司。因這批合約公務員都是比較有經驗的一群,他們離職做成一個行政斷層,而這個斷層直接做成人手短缺同埋影響在職公務員的士氣。所以政府決定調整薪酬,以希望減少公務員流失,穩定軍心。

不過,在政府調整薪酬時,好大意地漠視資力因數,一刀切加薪。這即時引爆合約公務員多年來積壓對同工不同酬的不滿。

希望政府給取今次教訓,在人力資源政策上有一些遠見,在公務員待遇處理上不要太草率。

K 提到...

薯仔:

不如參考一下我現時的情況吧。

我不是公務員, 但在公營機構工作, 您所講的好處和壞處, 會有以下的分析:

1) 極之準時放工。
一年內除了平安夜, 年三十和中秋節可以早放之外, 幾乎晚晚做到晚上九至十時(我本身是介乎低層與中層之間的員工)。

2) 禮拜六日一定唔洗返工。
機構行5-day work, 但今日星期六都返了工, 因為要趕deadline。

3)無甚deadline 壓力。
我個機構都多project搞, 不停要趕deadline。

4) 無工作表現落後既壓力 - 皆因年年係咪都會跳一個point。
長工可能係, 但作為contract staff, 真係睇performance。

5) 以薯仔既年資,一入去果下既人工,係會比現職既高。
可能係, 但俾著我呢d有十年experience和工作量而言, 我覺得我underpay(或者同我之前份工的人工被壓低有關)。

6) 政府入面太多規條,同薯仔既性格唔多夾。
有些部門係, 但有些部門未必係, 尤其要對公眾的部門, 規條太多會累事。不過個共通點係: 不論私人, 政府定公營, 一樣勁多辦公室政治。

7) 只要薯仔肯捱多一年,份人工已經高過政府所offer既唔少。
有些私人機構(尤其係專做政府/公營機構的contract-out公司)唔壓您價已偷笑, 同埋肯加薪真係千萬個感謝。

8)政府又無bonus又無double pay。
同意。

9) 咁細個就入政府,我都驚自己以後再唔適應commercial既生活。
十年前在同一個公營機構工作了半年(因為係temporary post, 當時仲距離中五畢業後9個月), 之後跳去不同陣營工作(包括大學,銀行及私人機構工作), 或者係咁, 我當時已懂得在私人機構生存。不過, 視乎個人點睇。

"或者政府既人工對如低技術既人黎講係高,但係對一d高技術既人,點講都仲係偏低......政府都仲係好難同其他大公司去爭人。"幾同意呢句話, 放在我現時的公營機構合用。