正式宣佈盡入睡眠模式

各位係薯仔咁耐無update過都仲肯入黎既朋友，薯仔心入面係感激你地既支持。。。但係天下無不散之筵席。。。薯仔經過考慮後，覺得現階段既我唔想再用"薯仔"呢個身份去繼續寫落去。

最大既原因，係薯仔想用另一個身份，係一個更無人知既地盤，去做一D薯仔覺得係會比較有意義既事。

多謝各BLOG友，尤其CM兄同AK兄對薯仔既支持，無左一個咁既地盤，同無AK兄既教路，薯仔之前既生活都唔會咁愉快。以家薯仔同狼女既鬥爭已經無咁激烈，同埋由於薯仔已有離心，薯仔亦預計不久既將來都會轉工，薯仔一副本死無大害既心態，反而得到一點點放鬆。關心薯仔既朋友，你地放心，薯仔過得好好的。。。。

祝各BLOG友心想事成，萬事勝意。。。。

做偶像

呢排roadshow既疲勞轟炸，加上前排睇到方力申既現場演出，令我終於打出呢篇我想打好耐既文。。。。就係，如果我係方力申，我會唔會做以家既方力申？

--------------------------------------

先此聲明，以薯仔既樣貌身材(身材如果操返一年半載可能會好D掛)，係絕無可能投身演藝界，以下既所有文都係假設性。。。。揀方力申，只係因為佢年齡同薯仔差唔多，而直到以家，都仲有薯仔既朋友或者同事以認識方力申/同佢方力申做過同學食過飯為榮。

---------------------------------------

其實，當去到港大時，我係方力申既話，我都會出黎唱歌搏一搏。

始終，純講職業，演藝界係好需要天賦先做到既，以薯仔既性格，有個咁既機會係眼前，我知道我唔試下一定會後悔。結果開頭都好好，一陣間又話買車，又話諗住換樓，又真係幾有前途咁喎。。 。

但係過左咁多年，我可能會有D後悔。。。。

做演藝界好難轉行既。。 。。做左咁多年，應該都明白自己唔係天生食呢行飯。唱歌咁多年黎都係差唔多，拍落去金牌咁多個歌手，個個都好過自己，拍戲更加係唔得。。。佢唔似阿SA，一出道係唔唱得，但係真係有進步，同埋為自己建立一個市場。。。想當年薯仔曾經為左佢去聽一個唔洗錢既音樂會，以家佢仲停留係同一個LEVEL。

但係做左咁耐，唔做都唔得。。。做得藝人，尤其係半紅不黑既，係好難再轉行。

做左咁耐，先至可以開第一個音樂會。。。。以家上親報紙，通常都係要除衫/爆呔/自己出黎搏宣傳。係我既，我真係會幾心灰意冷。

唔想做(當然，係比著薯仔先唔想做，可能方力申自己仲好想做)，但係仲要逼自己做，仲要逼自己做一D我覺得係幾無尊嚴既事(除住衫/扮拍拖咁比人影相)，我會好唔開心。。。。

呢D純係幕前時方力申比到我既感覺，幕後可能比人小到飛起我唔知。。。但係睇過四大天王，我都知幕後既藝人係會仲辛苦。

----------------------------------------

係，薯仔係唔靚仔，係無方力申咁溝死女，我曾經都羨慕過佢，如果有佢咁大隻/靚仔就好喇(以家睇相，都開始見佢有呢個唔操既後遺症。。。個胸開始DUM到個女人咁)。。。。但係去到以家，薯仔就覺得自己開心過方力申。。係，搵錢係無佢咁多，無佢咁靚仔，無佢咁多女為自己尖叫，但係薯仔樂於做返以家既薯仔。。。如果有得揀，十年前我會揀做方力申，如果有得係十年前睇到十年後既今日，我會揀做今日既薯仔，樂得隱性埋名，活得自在。。。。

道德

薯仔在很小的時候，如果急於小解而附近沒有廁所的話，會被薯媽被逼就地解決。

當然，起碼近十八年都沒有發生過類似事情。

然而十八年後的今日，如果薯仔被審判，薯仔是無容置疑地做出一些不光采的行為，是不容否認，絕對是"錯"的。因為知錯，薯仔十八年來沒有做過類似行為。

------------

對是對，錯是錯。我絕對不會稱十八年前撒的一泡尿，稱之為"春夏之交的天真無邪"。

小fans

睇黎呢個blog要就黎改名，舊時因為得閒而自稱閒人，以家已經變晒。。。。。

------------------------------------

講得太多工作上既事，咁就不如轉一轉講下其他事。。。。有時日做夜做，覺得自己除左工作外，已經無"life"。


可以話薯仔天生有d表現慾，薯仔亦諗過自己會有d"粉絲"時既感覺(唔係普通既support，係一個三唔識七既人純因為薯仔做既某d事情而support)。。。而呢種感覺幾日前無意間有左!

話說，薯仔未寫blog之前(又或者寫緊blog既時候間唔中都有寫)，除左自己寫下diary，亦都會寫下一d網絡小說黎過下手癮。當中既筆名當然唔會公開，正如知我筆名是誰者亦都唔會知道薯仔係以"薯仔"既名義黎寫文，否則知情者越多只會令薯仔曝光機會大增。

當日篇小說曾幾何時在網絡某處流行過，留言者眾，渴望一睹薯仔風采既人亦唔少，但係薯仔係堅持唔會見班讀者朋友，因為薯仔一怕自己身份曝光會惹來無謂指點，二來亦如蘋果既區樂民一樣，我一出黎就會嚇親班讀者，然後對我筆名之後寫既野興趣會大減。

但係點都有三兩個人知道該筆名既人係我(正如總有三兩人知道薯仔係我)，話說當日有d野傾，約左出黎，席間多左個人，言談間知道，該不知名人士應該係慕名先至出席呢次約會。

乍驚(無諗過會見到讀者)乍喜(終於見到fans喇!)下，薯仔膽戰心驚問起。。。"你讀我篇野時，有無諗過寫既人既樣會係點。。。？" 佢無言。。。。相信薯仔令佢幾失望。

席間朋友如常踩薯仔寫既故事時，該fans立即出言維護，薯仔亦沾沾自喜。。。。亦令薯仔諗起，一個小數知道薯仔係該作者既朋友，憶述一日如常落酒吧，言談間和那些"新朋友"略略提過認識那個筆名的人時，那"新朋友"立刻求見。。。。薯仔自己在暗處大笑數日。

-----------------------------------------------------

薯仔還在求學時期時，無乜自我存在感價值問題，薯仔唔係唔識讀書/考試/買名牌/踢波/打波/溝女等，但係無諗過要做某d事去證明自己全在同與別不同，其中好可能一黎薯仔好耐之前已經寫網絡diary (同以家既blog差唔多)，同埋呢一篇故事比到薯仔好大滿足感。。。。

寫，可能要用好多時間，但係唔寫，就唔會有今日既記憶同滿足感。。。薯仔既格言係想做就做，唔傷害到人既野多D嘗試都唔怕，否則到左今日可能我會怨自己點解唔做。。。朋友，你又有無D一直想做但係又無做既事？

放榜

放榜的季節，帶幾分喜悅，也帶著幾分哀愁。

報紙上，電視上是狀元們的勝利照，又或記載他們的讀書心得。。。。對，一個八加二，他們是勝利者了。他們是有權在這日子笑的。

中國人，不，全世界的勝利者都是 - 越成功，越被後世既載的勝利者，越是踏著其他失敗者的骸骨而被供奉的。

媒體都在包圍勝利者了，為他們的功績所歌頌，雖然他們只是十多歲的毛頭。這一句句的歌頌，有聲的，有形的，使我們相信著，對，我們並不喜歡這個教育制度，但都要在這下好好生存著，要成為其中一個可以笑到最後的人。

打頭陣的是勝利者。攝影機的背後，拍不到十四歲女狀元的不遠處，有一個瓜子口臉，身穿小背心及緊身牛仔褲的少女，在幾個摯友安慰下痛哭，哭訴著為甚麼自己總算付出不比女狀元少得多的讀書時間，推掉多少男同學的約會，將自己難能可貴的光陰放在自修室中，卻只獲得三分，一個連自己學校都不會給予機會重讀的分數。

會考不是一輩子最重要的事情，但確實是代表前兩年的努力，和直接影響後兩年的命運，和是這近年最重要的一件事。沒有會考，會有高考嗎？不。。。應該是，沒有會考，還能考嗎？人生還有價值麻？我的人生還可以有會考嗎？

有甚麼安慰的說話嗎？那幾位輕拍著背安慰著這哭成淚人的女生想。

不。她們不約而同的搖頭。她們都清楚，如果自己的會考成績是差如斯，甚麼說話聽下去都只是bull shit。甚麼會考零分無所謂？一個連自己學校都嫌棄的分數，真的沒所謂嗎？

她們四人，昨天還在NEWAY內笑著唱著，說到共同進退。退？她三分當然要退，我廿三分怎麼退？昨日的諾言，今天是一支針。

這邊是喜氣洋洋的。這邊是各懷心事，愁雲慘霧的。

----------------------

當這位新貴女狀元滔滔不絕地說自己的勝利感受時，忘記了，她是踏著她垂死的少女身上去發表勝利宣言。狀元看的，是一片滿佈陽光，綠意盎然的青草地，而被狀元一腳踏在心口的女孩，伸著抖震的手，看著裙底的黑暗，和那根大柱透穿她的身上。

辦公室法術

安諾勿斯：

薯仔睇到你既問題。。。但係。。 。唔好以為薯仔真係有乜野政治手段可以達到唔做野都唔會比人媽叉咁厲害 - 而事實上，薯仔係無得權既。

薯仔堅持有d野係唔可以做 - 例如以手段去害人等。如果真係卸晒工作比班兄弟姊妹既話，薯仔係公司都唔會有朋友。維持良好工作關係，比起早放工更加重要。

ok，講到呢一點，薯仔繼續講點解薯仔工作進度嚴重fall behind都無事。

薯仔一向都係一個有少少計劃既人，做野會預計到未來兩星期至一個月應該要做乜野，然後有時即使份job未到，我已經做左唔少準備工作。

呢期唔好彩，薯仔有好多野都係under狼女。係，個個都知道薯仔唔會同佢合作愉快，但係形勢使然，薯仔掙扎過，都係徙氣。。。。。但係貿貿然將自己既命運放起狼女手上，都唔係我既所為，薯仔咁被動既話都唔會生存到以家。

薯仔先係豹係森林度過餘生既時候，盡力做多少少野，令自己盡量少需要用高層既authority，跟住豹正式離世時，薯仔就要醒目睇定 - 係，公司入面個個都做到無停手，薯仔都係要做到pk，應該既 - 然而，公司入面既job唔少，而薯仔既經驗值亦令薯仔可以沾手technical少少既工作，加上薯仔既work list裡，有唔少job既上頭已經走左，令薯仔成為唯一一個明白一件事來龍去脈既人，薯仔大條道理去接呢一堆job做。

加上運氣，突然間有個突發事件，之前個客係薯仔跟開既，咁薯仔就立下決心，除左狼女既job唔做外，我乜野都做，做做做做做，做到令自己全公司都明我係做到pk。。。。。而出黎既結果，薯仔完成既野係同級人士中數一數二既多，咁樣薯仔又點會因為工作進度fall behind而比人嘈？(official既說法，係薯仔多左突發事件無可奈何，而實則係人都明，見到大部份都係狼女既job嚴重fall behind，都知薯仔揀野做)

以上既做法，有兩個危險：

1。薯仔結果係狼女既job，有一半shift左出去，淨返五分一係跟狼女，淨返既薯仔直接打大佬。咁樣shift一半狼女既野出去，係未會犯眾憎？一，狼女唔係對個個都咁有攻擊性，有好多新同事都仲對佢無乜感覺。二，除左一兩個人外，個個淨係識背後講狼女壞話而唔敢向上頭反映，如果真係因為要咁樣而要跟多d狼女，俗d講句，抵死。

2。咁樣玩手段法，我開頭都驚我形象會被破壞，但係諗深一層，老虎燊哥等既人都明知我唔鐘意狼女，慷慨就義只會令佢地變本加厲，我都要令佢地明白，我再under狼女，我會唔開心。。。如果再係咁落去，我大不了一走了之。。。薯仔呢次製造既"人事問題"，係可能會令薯仔係management心目中麻煩左，不過，well，凡事都有代價。。。

森林形勢好微妙，薯仔始終係food chain既低下層，一個唔覺意就會比人食，所以薯仔要步步為營，要好好咁令老虎做我既保護網。。。老虎亦唔輕易保護人，所以要向佢投明外，亦都要盡力保持工作質素，令自己係management心目中既價值有增無減 (亦即係之前講既"醒目")。。。。

--------------------------------

做到pk既時間，終於過去。。。。

新一期既work list，薯仔睇落去都明呢個係老虎關照下既製成品。 。。薯仔心中感激!

ak， 你在何方？

ak兄，薯仔未敢猜測你突然close blog既原因，但係有緣見到此msg既，留低個email比薯仔，等他日東山再起時(如以其他名字)，薯仔可以拜訪您既大作。

--------------------------------

各朋友

薯仔想離開森林，已經之前都提過幾次，亦都有過實際行動(秘密搵工)，奈何想轉field亦唔係易事。。。如果係留返係以家呢行，我係無乜理由要離開以家間公司。

豹臨走前，同kate講過，你係呢間公司生存到，你去到其他公司會覺得輕鬆好多。。。即使係同行，都唔係間間公司好似以家咁大壓力。。。。所以以家可以當做係一個好好既訓練。

之前一路講既，都只係咁內以黎既隨心而發既心得。

有一日，老虎突然發覺，原來公司既工作進度未如理想，要我地一眾低層人士同狼等報告。薯仔係其中一個嚴重fall behind既例子，但係仍然心安理得，到最後開完會安然無恙時，甚至同隔離既david講。。。

做左咁耐野，點會唔識得點樣保護自己呀？

講左呢句，我自己都有d驚。工作經驗再融合ak兄所教既職場求生術，原來已經深深改變左薯仔。

薯仔未至於老奸巨，然而避重就輕揀job做等既壞習慣就開始develop。同狼女既合作唔愉快，以家就一邊卸job一邊自己自立門戶，逃避佢既影響力。

薯仔唔妥狼女，都已經係公開既秘密，除左新入職既同事外，老虎都知。佢地都準量唔安排薯仔跟狼女(當然，公司細，係好難做到河水不犯井水，況且狼女不犯薯仔都會犯其他小貓狗)。薯仔都明白得些好意須回手，人地做左野我都無謂不斷咁要求，自己醒醒定定就算喇。。。況且狼女自己都唔會想同薯仔合作，邊個鐘意一個細既會下下駁自己？

以家公司形勢日漸明朗，薯仔出身於此，加上得到老虎既信任，有job都會落黎先，都唔洗驚係呢度既前途問題，只要唔犯大錯，加上薯仔得眾人(除左狼女)歡心，應該無乜大問題，所以暫時唔理office politic住。

既然走唔到住，就要比心機係呢度做，一為自己前途，二為人地既然信我，我都唔可以辜負人地既期望。。。。不過，我都唔覺明年今日，我都仲會留係呢間公司。。。

我要高飛

查 兄

以薯仔來說，香港同內地城市既關係就有如一班同學既關係。

香港以家考緊第一，但係都要同同班同學好好合作，但係亦都唔代表大家無競爭關係。

始終，升班既名額係有限既。

即使北京上海都有不和，美國同俄羅斯都可以合作，呢個世界，全部人都係朋友，全部人都係敵人。

-----------------------------------------------------

唔知大家有無睇過一套漫畫，係講體操既，譯名叫我要高飛？

內容係講一班初中定高中一班對體操有理想既男仔，一齊為稱霸世界而奮鬥。

當中既一個主角，唔記得叫咩名，係講佢玩單鋼好叻。佢既格言，係要睇到世界選手睇到既視野。。。。所以佢要越飛越高。。。

以家諗返，呢句說話好有用。

即使係返工既打工仔，自己問心，睇唔睇到老闆既視野？

以家返工既薯仔覺得最大既得著，係可以睇到各勁人既視野。

-------------------------------------------------------------

只要自己明白老細既視野，然後同佢企係同一陣線，嘗試在當中找一個立腳地，就會突然間發現，所有問題都會好易迎刃而解。

你既問題即係老細既問題，你既著數即係老細既著數。

再問心一次，你係對老細對著幹，定係同一陣線？

中港機遇

如果香港唔係身處現有位置，究竟香港會變成點？

只可以講句，一定無以家搵得咁多錢。

香港最大既天然資源，就係本身既地理位置。點解我地既人均GDP可以咁高，有好多都係同中國有關係。

香港人靠自己食自己既年代已經過去，唔係利用祖國既一些優點，香港唔會死，但係都唔會過得好自在。。。。我地，尤其薯仔身處既行業，好可能要離開香港去覓食。

我唔係話中國勁中國醒中國無得頂。無論你係身處乜野行業，都要明白無左中國，你以家未必咁"自在"。

明白自己依賴祖國，但係都唔係代表要"奉承"祖國。要明白，身為一個有責任感既中國人，我地係要將香港既優點帶去內地，介紹比內地人識，而唔係乜野都亦來順受，將多年內中國人敢怒而不敢言(敢言的，恐怕不是而死，已經逃離內地)的崎型生態改掉，去創造一個我們會真的喜愛而去居住的地方，而不是因為錢才入去住的地方。

------------------------------------------------------------

以家呢個機遇係難得既。難得既係，外國對中國既需求大，而中國對外既需求亦大。

個餅咁大，基本上唔係一兩個城市會食得晒，再加上香港既品牌，國際上尚算有保證。

只要經濟未衰退前，大家都唔需要驚香港會食唔到條水。

即使係經濟衰退，大家都仲未需要驚。除左香港本身既某D行業仍然企得穩外，其實上海北京同香港仲有一段距離。唔係講建設，亦唔係講最TOP果堆人，而係香港可以比到人既感覺，係唔同北京上海，係唔需要提心吊膽。

薯仔係香港送一個女仔返屋企，其實係純粹風度既問題。但係係內地，就會有呢個實質既需要。

除左安全感外，其他素質仲有一段距離。

即使北京上海點樣建設，亦只係空有軀殼而唔會有靈魂。

而當你身在置地廣場，深深呼吸一下，你是真的會感覺到置地是有生命的。

----------------------------------------------------------------------

一個教授對薯仔說過，現今社會，你唔可以淨係諗住留係香港工作。

你問我呢個機遇重唔重要，我會答重要。

要唔要把握，當然要。

但係最重要既係，你要身處於一個位置，要令到自己覺得有安全感，令自己明白即使有無呢個機遇，將來香港點都好，自己都可以在地球的某一方，以自己的技能，好好的生活落去。

再談夢想

香港地生活逼人，加上社會大家既norm就係要人比人，要鬥大家住邊區，間屋幾大，有無車，身上著乜野衫。。。如果係要參加呢個遊戲，到死既一日都唔會完。(即使好有錢既，都要鬥隻遊艇大)。


有時覺得好累，自己都唔知自己想點。

要搵錢，以家搵既錢已經比自己讀大學時所想一出黎畢業時所諗既搵得多，但係越搵時，發覺。。。。

讀書要錢
家中兩老過得好要錢
自己過得好要錢
要為自己未來打算更加要錢
。。。。。。。。。

薯仔並無家產，將來第一桶金當然要靠自己搵。可以教大學還可以有大學宿舍，但是現在。。。難得可以見到一個希望可以自己置業，一條清析(唔需要靠樓上既人走)既career path，要薯仔為左一種虛無既目標而走，除左難以統身邊人解釋外，亦難以同自己解釋。

-----------------------

查斯特

以家中國既機遇當然難得，薯仔份工都多得佢唔少。。。。。呢樣薯仔容後再談。

------------------------------

職場update

薯仔呢排過得幾好，薯仔變做小狼後，雖然未有狼既殺傷力，但係待遇明顯有點不同。老虎仍然處處關照，表面並不偏心但可以感覺牠的心意。

想講既，係之前appraisal時，各人對薯仔既評語。

無論是薯仔見的高層，抑或其他人自己問高層可以從朋輩身上學甚麼時，薯仔從四個人身上得知，薯仔最大的優點是"醒目"。

從此，薯仔不其然諗起某成功人士所講既野。

一個人醒目又忠心，當然要重用。
一個人蠢但係忠心，仍然可用。
但係一個醒目得濟既人，就要小心。

所以薯仔對"醒目"呢個詞不嬲有d介心。。。。況且薯仔並不覺自己有過人之處，被人覺得醒目，純可能是之前與狼女作對時，要越級挑戰時準備充足，互有勝負下被人得出既結論。

如果appraisal就是建基於此等評語上，appraisal都真係幾兒戲。

夢想？

薯媽同一個識講廣東話既印傭閒談。印傭言談間，透露自己已經結婚。她芳齡廿五，來香港工作前，已經在新加坡工作了兩年。

薯媽驚訝，"咁你幾耐無見過你老公？"

"都幾年羅。係我地鄉下，十八九歲就要結婚，唔係人地就會問你點解你仲唔結婚。"

薯媽默然。薯媽芳齡十八時雖已被薯爸所騙而墮入薯家，但直到現在她還是日日見著薯爸，薯爸雖然說不上出色但總處處將就薯媽，說不上富有但總算仔大女大，屋企有蟑螂大喊一聲即有人為她代勞。薯媽想不到，如果自己後生要像眼前印傭般漂洋過海，會是何等悽涼。

"我都唔理佢羅。佢做咩我唔知，我做咩佢都唔知，幾年都無見過佢。"

這何否解釋到，為甚麼香港好像很多外籍傭工都是TB？

------------------------------------------------------------

每個人都有自己的夢想。只是可能，我們忘記了。

薯仔小時候，沒想過做醫生，有想過做律師，因為看來只要上庭嗌交就可以生活豐足。

中學時，想過做老師，因為薯仔相信自己有這能耐之餘，老師的工作亦比較嘆。

對，其實小薯未有想過服務社會等的念頭，薯媽從未灌輸這等信息予小薯。

直到大學，薯仔想當一個大學教授，因相信自己有這種能力，可以帶來更多理論，改善我們現有的知識。但是，大學淘汰了薯仔，並不容許薯仔繼續升學。

現在，薯仔想運用自己的學識，做一份自己喜歡的工作，然後，到四十餘歲時，如果好運已經不用費心工作已經衣食無憂，我是很想投身慈善事業，在某個基金當想要職，然後好好還用那些錢，幫助一些應該要幫助的人。

眾生皆平等麻。

當然，薯仔還有很多時間才到四十多歲。。。。

--------------------------------------------

如果自己在現職繼續打拼，而可以保持著現有的職場形勢，薯仔應該可以達到四十多歲退休的目標。

但是，這樣的話，未來十多年薯仔都唔會點樣開心。工作的壓力現在已經令到薯仔有點精神緊張，在夢境見到公司或同事已經越來越頻密。

有一日，薯仔與DAVID 閒聊時，談到已經有離心，唔想再在這個森林繼續覓食。豈知，DAVID亦有此意!

大家惺惺相惜，都覺得雖然現在的公司人工高福利好，但都不是自己心中理想的工作，都害怕自己有朝一日做了金錢的奴隸時，發覺我們已經離不開這一間公司。

----------------------------------

有時，望著自己的名片，覺得很陌生。估不到，我真的可以在這公司捱那麼久。

好像一份好玩的工作，就不會有錢。錢，真的是一種珈鎖？

政府工唔係正工

前排飯焦臨走前如怨婦般掉低既一封公開信，薯仔亦有d感觸。。。。。

---------------------------------------

以家既政制係奇奇怪怪。公務員本身入政府係應該作為一個執行者，而唔係決策人，但係家下既角色變得模糊，好似有鑊就賴晒落去公務員身上。。。。

------------------------------------------------------------------------------

政府係前排經濟低迷時，因為相對上公務員既待遇實在太吸引，所以一半係群眾壓力，一半係財政壓力，請左好多合約工，貪其人工低同唔需要提供福利。

合約工係經濟低迷時其實係ok行得通既。例如當時薯仔見到學生乜乜資助處請人，人工係唔高，好似係七八千，但係講到明五日半，一定準時走，加上唔洗驚會走糧，果陣都吸引到唔少人去申請。

因為果陣既香港，唔係"返緊乜野工"既問題，係"有無工返"既問題。

但係經濟一好，就有問題出現。

公務員之睇落去係薪高糧準福利好，係有佢地既犧牲。一入政府深似海，係呢個無甚誘因既環境下工作，好多時都等於放棄係前途上苦拼。

講真，除非係讀某d engine，係香港係無乜工揀既，所以逼住要入機電署等到做，否則又有幾多個對未來係有希望既後生仔係會對一般政府工係有興趣？(AO除外)

所以，都係果句，要搶TOP既人，如果係市場有需求既，政府係好難搶得贏。當中表表者如商界，貿發局年年都會請TRAINEE，好多大學生都會爭住去報，但係讀global bus又或者quant fin既學生又點會去睬佢。。。。舊時既話，我肯受你個salary system，覺得我唔鐘意大壓力下工作既，咁咪肯受，又有loyalty咁去做。

但係以家大家對政府既要求係高左既(如果大家年紀有返咁上下，再比較返回歸前既政府機構運作，以家既人係未好左同nice左，有效率左？)，有唔妥就即刻投訴(例如公立醫院，舊時比姑娘鬧就會唔出聲，以家既姑娘就nice左好多)，以家既"付出"同"回報"，就爭左好遠喇。

例如，舊時肯同政府捱既，好可能都係得過且過等退休，但係以家既環境就要變坐同人爭。

壓力大左，入面既人當然唔鐘意。。。。呢幾年，公務員既角色變得好快。。。況且，以家仲有個危機可能除時比人兜。

------------------------

經濟學上，合約工係合乎經濟原則既，皆因每年續約，逼住你去努力咁做，唔係好似往日既公務員咁既鐵飯碗，邏輯上政府既效率同成本應該都會降低。

如IT人，以家係市場，用返萬四五蚊去請個大學畢業生去做SYSTEM ADMIN，大把人報，點都好過用幾萬銀留住個與時脫節既人。。。。如果之後發覺請果個IT人既SKILL已經過時，咪再係市場請過囉，以家果個就會被標籤為"脫節"，唔再續約又唔洗賠錢又唔洗解釋。

係呀，好殘酷架。

但係政府唔同私人市場。。。。政府唔會無啦啦升職加薪去留人，可以跳point，但係如果係某d細point跳黎跳去都係一二百。。。。

所以我都叫人，入政府唔係公務員既term真係唔好入去，如其中某個政府保門就好慘，自從話可以請返公務員後，近乎所有合約工都不獲續約。。。都唔好話乜野同工不同酬果d野。。。

-------------------------------------

除非係等退休/等生仔/有老公養/市場競爭力唔夠。。。。否則，如果有得揀，唔好揀政府呀。。

劣幣驅逐良幣

先多謝各blogger留言比薯仔。飯蕉離職後，薯仔下一篇就會寫返對公務員既另一種感想同回應返各留言。

-----------------------------

我個topic，或者大家都聽過。

其實，呢個聽落去係同錢有關或者係同經濟有關既事，係可以應用於我地生活上好多範疇。

薯仔試舉兩例。

--------------------------------------------

1 公司政治

每個人既出發點都係做好人，只不過我地每個人心目中都會有一個價，而到左呢個價位後，我地可能唔再理會我地心目中做好人既規條，開始做人地心目中覺得既衰人。

有時，做一個老細，可能自己情緒又或者做野方法既問題，而令到佢既下屬覺得唔舒服。

其實呢個問題唔大，只要佢既下屬頂得順，覺得呢份人工受呢d奇怪問題係無所謂既，你情我願，係自由社會當然ok喇。

但係，公司慢慢咁大，老細既下屬都有下屬時，好可能就會跟返老細既方法去做野，從而令到最低層好難做。

或者。。。用薯仔黎做例子。

薯仔一向覺得，新入職尤其初畢業既同事係乜都唔識，係要教，你請得佢返黎比咁少人工佢，就已經證明佢既工作能力係有限。但係，因為獅子越做越大後，因為自己勁佢容忍唔到其他人蠢所以會鬧狼群，咁狼女見大家都受呢一套佢又用返呢一套對junior，結果成間公司都瀰漫住一股怨氣，細既都怕做錯野而比人周所以令大家都提心吊膽。結果班細既，叻既人離開森林，淨返一班想走又怕走左無以家咁好待遇既人繼續留係度，咁間公司，唔會再留到乜野人才。。。

------------------

例子 2

歪理戰勝真理。

如果大家係內地長大，好可能對六四既認知係兩樣：- 1 從來唔知有件咁既事 2呢個係一個由外國反中反共勢力策劃既一次大陰謀。

我地都知六四係一次屠殺，一晚殺幾千平民都唔算屠殺咁南京果次都唔會算係屠殺，但係中共為左維護自己，自然要做好多藉口去維護自己，要去教育大家相信六四係對的。

咁大家都係係呢一個謊言既環境下成長，比呢種偽道德去教育，咁中國人既水平又點會追得上"文明國家"。。。我地又點可以怪一班內地人覺得打尖先係王道？

前排既山西童工，薯仔相信只係冰山一角。無政府既包容，同對班家長既打壓，件事唔會拖咁多年先爆出黎。

貪污，人之常情，全世界都有。但係呢種拐帶童工，虐待，係一個龐大既組職性行為，參與同知情既人要有返幾十人做到呢一個規模。。。但係中間，竟然無人因為良心而告發，甚至乎一班應該愛民如子同無私既高官竟然淨係識壓住件事去毆打返班父母。。。。呢個現象，又會正如全國工協既阿頭講，"係好個別個別既例子嗎？"

中國號稱自己係禮儀之邦，原來禮儀之邦就係大家唔出聲去虐待一班細路，赤裸裸地扼殺一班小朋友快樂生存既權利。

。。。。。。。。。。。。。

呢一刻，不其然又因為自己係一個中國人已經覺得羞恥。。。。

如果有一個外國既朋友，問我中國究竟搞咩架？

我會面紅。

公務員

前排公務員大加薪，大致上社會既聲音係 1)政府班人又亂洗錢係班唔做野既公務員身上，同2)2001年入去既公務員好唔抵。

2)呢一點，薯仔唔係公務員，亦都唔知實況係點樣，所以唔加評論。薯仔想講既係，第一點。

---------------------

薯仔呢一行，其實同政府裡某一行工種好相似，而有一部份薯仔既同事亦因此投入政府既懷抱。

先講下如果唔做薯仔呢間公司，做政府既話，有乜好處：-
1) 極之準時放工
2) 禮拜六日一定唔洗返工
3)無甚deadline 壓力
4) 無工作表現落後既壓力 - 皆因年年係咪都會跳一個point。
5) 以薯仔既年資，一入去果下既人工，係會比現職既高。

可能以上既條例太吸引，所以政府話cut開支時，呢份工一路都係contract base但係都唔愁無人報。薯仔前排做到谷鬼氣時，亦都試過報政府呢一份工，而政府都比左個offer薯仔(果陣轉返做公務員)，但係薯仔諗左好耐，結果都係留起以家既公司，因為。。。。。

1) 政府入面太多規條，同薯仔既性格唔多夾
2) 只要薯仔肯捱多一年，份人工已經高過政府所offer既唔少
3)政府又無bonus又無double pay
4) 咁細個就入政府，我都驚自己以後再唔適應commercial既生活

-------------------------------

政府呢一個部門，佢想請返一d 精英，所以之前政府一話可以某部份開返公務員既post時，佢都好快咁用"公務員"去請人。

但係奈何，唔好話係合約制，即使係長工，佢未加人工前既成效都係一般，好大程度係因為佢本身想請份cv靚既人，無咁好睇既又唔肯比offer，但係份cv靚d既又會覺得佢份人工係偏低。

之前既一次recruitment，薯仔從一個朋友得知，呢個部門請人係頗失敗，有四分一到三分一既candidate係reject佢個offer，都係不外乎佢想請人既同時，如薯仔咁既公司係依然會大幅度加薪咁去留人。細公司出黎既唔肯請，大公司出黎既佢比既條件又唔夠。。。。

好喇，以家終於放風出黎，話會大幅度加薪。。。。我睇返個salary level，大幅度加薪後係幾吸引，如果呢樣野係一年前比薯仔既話，薯仔可能都會受，但係我諗等得佢比垃圾會通過，又要等返一年半載，果陣出面又會再次加人工，咁政府呢個salary，好可能只可以吸引到一d好green既人又或者係commercial發展得唔如意既人。。。

---------------

事情咁又要諗返去。。。。政府有無需要係請社會上咁頂級既人才？

呢個就要在乎份工重唔重要喇，如金管局，我地係要請返一d勁人去睇住。而薯仔之前所講既部門，薯仔覺得即使唔需要請最勁既人，但係都要請返upper quartile既人，咁政府先唔會蝕底。

-------------------------------

或者政府既人工對如低技術既人黎講係高，但係對一d高技術既人，點講都仲係偏低(well，對於坐得最高既，如受千幾萬一年既任總，薯仔暫且保留評價)，政府都仲係好難同其他大公司去爭人。

咁各位朋友，仲覺得政府既人工係咪over estimate?

暫停公告

呢幾日，忙到想喊。一日廿四小時，除左搭車沖涼訓覺，就係做做做，食飯果陣都要諗條橋出黎要大家滿意。

以往既薯仔，對於工作其實感覺想就同係大學時讀書考試做功課差唔多。

即係，識既，咪快快手手做，唔識既就問人，問完人唔得咪最多唔L做，扣我少少分我係咪都合格畢業。返工都係咁，唔識既就問人，再唔識就比中層做，總之有解決既方法。

今次，就好似淨返自己，有一種徬徨無助既感覺。

直至個問題解決為止，否則我應該都唔會update呢度住。

寬恕，和諧

人說明報左傾，親共，讀罷今日的寫評，薯仔不信也不行了。

六四是心中一根刺。我們不認識，不認清當中真相，是對當年死者最大的侮辱! 薯仔立誓不投民建聯一票，最大原因是不能忍受一個政黨竟然說六四"歷史自有定論"。

今晚維園有五萬五千人，一起懷念當年為理想而犧牲的學生。正在讀這篇文章的你，未必是五萬五千其中一分子，但我希望你可以認清這段歷史，認清獨裁政權的可怕。。。十八年前發生的，今日一樣可以發生。要避免這事發生，是需要你我一起去提醒大家，如果我們盲目相信中共，甚麼都可以發生。

很希望有一天，可以在天安門廣場獻一支花，向中國的偉人致敬。
---------------------------------------------------------


【明報專訊】今天是「六四 事件」第18周年，1989年之後，每年到這個時候，許多炎黃子孫都心情複雜，追悼六四死難者之餘，也為民族如何走出這段歷史傷痛而深思。


1989年6月4日，中共出動解放軍 鎮壓一場愛國民主運動，造成學生和北京 市民重大人命傷亡，此後18年，「六四」成為大陸官方和民間的最大禁忌。官方不願提起六四事件，因為無論有千般理由，無論怎樣強調鎮壓有理，但是為何用如此暴烈手段對付學生和人民，官方明顯理不直、氣不壯。這些年來，中共當局對事件作冷處理，限制人民討論，希望事件逐漸被淡忘，官方迫不得已要提及此事，也只是以「1989年春夏之交的政治風波」回應，明顯地不欲刺激人民的情緒。
民間不敢公開討論六四事件，是不想招惹麻煩，但是不代表人民忘記此事，40歲以上的人，對於六四事件的原因和處理結果，大多心中有數，一些人在閉門竊竊私語時的義憤填膺，甚是嚇人，顯示民怨仍深，民憤仍大。六四事件是橫亙在官方和民間的一條巨刺，不設法使之消融，大焉者，窒礙民族提升、國家發展，小焉者，對於構建和諧社會，也會事倍功半。因此，當今中共領導人宜應慎重考慮，解開六四糾結，尋求與人民和解，構建一個名實相副的和諧社會。
當今中共領導人就六四事件尋求與人民和解，有如下有利之處。首先是他們就鎮壓行動，沒有直接責任，在政府就事件概括承擔責任上，有更大的迴旋空間，也較容易得到人民的寬容。其次是六四事件後，中國經濟飛躍發展，國家體質較厚實，給解決敏感問題提供一個基礎，因為承受得起。（附帶一言：絕對不應該視經濟飛躍發展為六四鎮壓的必然結果，如果堅持這樣的認知，那是正義與邪惡不分，文明與野蠻不分，甚而是人類與禽獸不分。）
另外，人民都珍惜國家目前的局面，藉六四事件鬧革命，搞個天翻地覆的可能性不大，如果有人欲藉此搞亂中國，相信會遭到絕大多數中國人反對。還有是當今中國領導人在國際間的形象，會因此煥然一新，國家贏得更多尊重，人民在外國人面前，也不再因為六四事件，好像矮人一截。
和解需要一個過程，毋須一步到位，例如可以先從人道主義手，撫平六四死難者家屬的傷痛，協助有需要者解決生活問題，准許去國異見人士返國等，只要開展了這些工作，人民感受到政府的誠意，氣氛頓然改觀，和諧局面於焉浮現；至於事件真相、追究責任問題，可以在更適當的時候處理。
政府擁有足夠資源，有責任主動提出和解，不過，一個巴掌拍不響，如果只是政府一廂情願，人民不願意配合，也屬枉然。這個和解工程，絕不簡單。以香港而言，這是全球就六四事件的重鎮，當各國各地激情過後，人們開始放下此事、淡忘此事的時候，大多數香港市民仍然以集體記憶的情懷，共同堅持六四事件必須平反，這個集體意志使人感動，為釐清事件的是非黑白留植了香火。日後六四事件平反，歷史一定會記錄香港在其間起過的作用。按目前情勢觀察，六四事件要得到最終平反，還有漫漫長路，為免事件以零和方式解決，先尋求一定範圍和解，作為走向爭取平反的過程，我們認為是值得考慮的策略。任何一方偏執堅持，肯定無助事態的平和解決。
施明德 就台灣 政治亂局，最早提出大和解概念，雖然未能成功，但是他對和解的真義，有一段精闢論述，值得參考。他說：「當權者（非受害者）沒有要求受害者放棄悲情的權利，而受害者則有一個高貴的義務，必須去執行，那就是燃點寬恕之火。」坐了25年牢、迭遭政治迫害的施明德，所擁有的這種超越仇恨、不為心魔所役的大氣度，或許是我們舉國上下處理六四事件時所需要的。

森林形勢

薯仔好耐無打過森林形勢，以家一次過打返咁耐無update過既格局。。。

-------------------------------------------------------------------

中環人才短缺都唔係以家先知既事，薯仔身處既行業更係嚴重。只要肯轉職，升職加薪係等閒事。

而近來，因為各種原因，例如不能忍受森林文化同獅子坐正後接踵而來既工作量，導致有三位同事於呢段時間離開公司。

一個係rachel，佢既離去唔令人意外。一個小女子，除非有極強事業心，否則係呢個森林係好難頂得住。由於佢只高薯仔一個grade，佢既離去簡接令薯仔工作量增加。

另一個係一隻狼。佢既工作態度異常認真，令一眾細既有莫大壓力。佢既離去如薯仔既小貓小狗鬆一口氣。

令一個離去既，係獅子既得力助手，豹。

--------------------------------------------------

豹係一個深得民心既中高層人士，即使唔係under佢條team而只係間歇同佢合作既人，都會對佢讚不絕口。

雖然佢比薯仔高五六個grade，但係豹依然本著有教無類既精神，對薯仔做既種種錯事亦有一種包容既態度，雖然薯仔經驗唔夠，佢都好肯比薯仔去做各種嘗試，同跳過狼既一層，直接同佢對話。。。(當然，好多時佢都係最後自己做返。。。。)

豹係因為工作質素高已被獅子睇中做接班人同得力助手。以家佢既突然離去，除左令薯仔等人痛心外，亦都打破獅子心目中既如意算盤。

獅子遲遲唔肯官方宣佈豹既離去，相信除左有點惱外，亦都係怕一個深得民心既中高層離去會令一班細既增加離心。。。。得知豹離開既消息，亦只係豹見時辰就到，無謂令薯仔等小貓狗太愕然，早少少等我地知，可以有一個心理準備。

豹既離開，其實除左令薯仔唔開心外，亦有好多好實質既影響。

其一，唔知豹係想點，前排佢指派我去跟一個新既大客，而呢個客係因為唔滿意我地另一間關聯公司既服務所以轉檔過黎。

以家計返個時間，豹果陣未辭職都應該係立心要走。如果豹未走，我跟住豹去做呢個客，無問題，但係佢一走，好大機會會插另一隻狼入黎。。。。。因為呢個係一個新客，我已經算係知得最多既人，所以好大可能有機會直接同老細，即係大笨象交手。。。。同大老細交手，果種壓力。。。。

以家諗返，唔怪之得當日豹比個file我時，係到陰陰嘴笑。。。

其二，公司在一豹一狼走後，中層人士嚴重不足，亦令一眾狼同如薯仔等既小貓小狗加速進化。公司為求留人，薯仔亦可能係不久既將來會升一級。。

其三，公司森林文化嚴重，令薯仔經常精神緊張，除左老虎同某少數中層外，薯仔要對外亦要對內，身心俱疲，豹走後，薯仔係公司又少一個庇護，直接令薯仔既離心增加。

當然，一切都要睇之後既appraisal係唔係會有驚喜(升職應該係一定，爭在升職外有無多餘既著數。。。)。

------------------------------------------

豹前數日突然如交代遺言咁同薯仔講某一個大客既麻煩野，同某一個薯仔較親既中層(先叫做rita，佢以後應該有好多出場機會)係咁落一d job落黎比薯仔做(薯仔對某d唔友善既中層，講野語氣係會幾吋下)，令薯仔明白，自己係公司唔會再係一個細薯仔受庇護，而係開始要企向前線駁火。

望返轉頭，佢地已視薯仔為第二梯隊。

一路既努力得到認同，當然開心，但係，心入面硬係覺得有d唔安樂。。。係咪自己未準備好？

我們的香港

那位殉職的消防員，薯仔衷心希望你得到安息。

小薯亦對所有為香港盡心盡力的人致以敬意。香港之所以為香港，是香港人以血和汗換來的。

----------------------------------------------------------------------------

薯仔今日心情唔係幾好，現在對那位被薯仔KO的某手提電話網絡商的客戶服務員致歉。

事緣，或者大家都試過，手提電話突然響起，然後電話的另一旁會說道。。。"你好，請問你係唔係xxxxxxxx既機主x先生？。。。。。係，你好呀，我係xxx打黎架，為左表達我地對你長期支持我地服務既謝意，我地以家有一個服務想免費送返比你架，唔知先生你有一兩分鐘既時間聽下？"

薯仔對呢種唔係優惠既優惠已經無晒興趣，然而，薯仔明白大家都係打份工，所以次次都係好好聲氣咁話，"唔洗喇，唔該。"

然而，受過訓練的他們，是不會那麼容易放棄的。

"x生，呢個服務真係唔洗錢架喎，我地呢個新服務真係好好架。。。"

去到呢一刻，薯仔心情好時都仲會好好聲氣咁重複多一次"唔洗喇唔該"，而心清唔好時，語氣會惡少少，希望佢地會知難而退。

而今日既果位小姐，竟然問薯仔，"先生，你可唔可以比個原因我點解唔要呢個服務呢？唔洗錢架喎？"

嘩，DLS，你係我邊個？我用唔用都要比原因你？

如果係幾年前有點害羞既薯仔，可能真係會好比心機咁諗個原因比佢，又或者真係比佢考起，會諗唔到個原因比佢 。但係以家既薯仔。。。。

"我用唔用，唔洗比個原因你呀!？"我好惡咁講。

"ER。。。咁呀。。。。。"電話的另一旁，像未想過我會這樣回應。

跟住，我都嘗試NICE D，講聲拜拜。。 。。。

--------------------------------------------------------------------

自從薯仔之前的傳銷經歷，現在對那些死纏的SALES很反感。講多次，雖然我明白你們是多勞多得，但也請顧及我的感受，我說不要，真的不想要。。。

有一天，薯仔在旺角街頭遊蕩時，看見數個廿多歲相貌尚好的後生仔女，衣著認真，手拿一塊筆記版，像為街頭上的行人做問卷似的。。。。生活在香港多年的薯仔，當然明白他們是一堆賣保險的年青人。

薯仔的眼神，已很清楚告訴他們我絕不是一個"POTENTIAL CLIENT"。。。得意既地方，係聽到一個與薯仔年紀相約，尚算俊朗的年青人，在遊說他的女客人上車時，竟然係講。。

"黎啦，幫下我啦，好慘架我。。。。"

樽鹽何在!

初戀情人

相隔多年後，今晚和舊情人相聚一刻，故書以作記。

---------------------------------------------------

和她相遇時，小薯只是一個中學生。

情竇初開，遇見令自己心動的對象，與很多小男孩一樣，開心興奮得以為一瞬間找到終身對象。

她談不上美，也不算千依百順，對小薯也忽冷忽熱，但無戀愛經驗的小薯，仍然死心塌地。

小薯很喜歡凝望著她雙眼，尤其在其他平凡的五官下，她的雙眼更顯得突出。只要看著，看著，她的雙眼就像對你說話。越看越入神，那明亮的眼睛加上一點水汪汪的感覺，在燈光的折射下，好比一顆巨鑽在吸引著小薯。仿佛，世間萬物，只要配上她那雙銀，就能醉人。

小薯不是傻的，慢慢知道她並不是深愛著小薯，分開亦是早晚的事，但一副魂魄仍然比她的雙銀吸引著，走不掉。

某夜，她突然告訴小薯，我們要分手了，然後掛線。

小薯瘋了，打了無數個電話，希望挽救這段關係。

未能接通的電話打了一日，理智告訴小薯，小薯和她，已經沒有希望。

小薯在床上躺著，想著，眼淚不自覺地流下。小薯之前的所有計畫，都因為她的離去，變得沒意思。

初戀換來的，很自然是第一次失戀。失戀對小薯來說，是精神不振，心神仿佛，日與夜都是行屍走肉，連飯都食不了多少，一星期瘦了十磅。

----------------------------------------------

現在回想，當然是傻得很。現在退後一萬步想，即使當日不是她主動和我分手，小薯這刻也很可能離開了她。

當今晚和她坐在一起，閒話家常，說說分開後的日子，我們當日一起時的情節，倒發覺，我們是很談得來的"朋友"。

她的一雙眼睛，美麗如昔，不過，再怎麼吸引我的目光也好，我對她再沒有那種戀愛中整副心神都在她身上的感覺。

飯後，在海旁散步時，小薯看見她雙手抱著自己，問她一句，是不是覺得冷了。她微笑搖頭。

多年前的話，小薯會搭著她肩膀，慢步這個海旁。

而今晚的小薯，看著單身的她低頭在薯仔身旁一步一步的走，雖然心中起了憐憫，但雙手卻是不自覺地插入褲袋裡。

--------------------

道別時，我倆像有默契的，沒提再見這兩字。

炒股狂熱的推想

寫左篇認真既文章，以家寫返口語化既。

-----------------------------------------------------

坊間有好多測話股災既indicator，當中最為人知既當然係c9 index，即係話究竟多唔多c9係銀行搶住黎睇價為準。

然而，薯仔雖然年紀細，但係可以絕對肯定咁話你知，所謂既街坊都曉既indicator其實一d都唔準。薯仔由零一二年開始望住屋企對面間銀行，入面股票部既c9永遠維持一定既數目，無論係升市或跌市都好。。。。所以，大家千祈唔好信呢d坊間indicator呀! (雖然係咁，當薯仔有幾個連抽ipo都唔知係乜野既時候都問薯仔抽唔抽好，薯仔唔多唔少都有d介心)。

----------------------------------------------------------------

以家個個都話有股災，個個都話有泡沫，但係典解我地祖國(寫完六四咁大篇野，其實薯仔對祖國以家唔算係反感，六四既做法佢有佢理由，雖則薯仔唔認同)依然有咁多人訓身落去？

薯仔諗左個原因，就係我地都驚我地身邊既人活得比我地好。

或者，身邊既朋友，一個炒股票賺左，你會同其他朋友一齊羨慕下。但係，當一個，又一個，直至大部份既朋友都賺左，都活得比你好既時候，你雖然無做錯時，但係感覺上，自己的而且確係蝕左，或者係活得比其他人差。

薯媽曾經係零一零二年，叫薯爸學下乜野叫股票，入下市啦，亦純係因為見到佢好多雀友炒下炒下，仲好過日日贏我老媽子五六底! 以家，薯仔亦經常引用呢個例子，叫薯媽薯爸千祈千祈唔好學人入市，否則雖然以家窮到食粥水，但係入左既話可能粥水都無得食!

再講返股市。一個地方越窮，股市越令人瘋狂。。。諗下，一個工人，捱生捱死可能一個月得千四五蚊，但係用萬幾銀出黎，可能一個月已經有一個開。。咁點會唔搏？

係呀，佢地係知係有泡沫，但係窮既恐懼戰勝輸既可怕。。。以家每個人只想賺之最後一毫，點會諗咁多有無泡沫既事？佢地只會知道，今日抽身離去，就會賺少個其他人，亦即係蝕左，亦即係代表要開到幾晚夜車先可以補償返呢個"損失"。。。

甚至乎，當去到一個地步，就係入市入得比人少都覺得自己係蝕左時，果陣就算係瘋癲，亦比甚麼病態賭徒來得嚴重。。。。。

-----------------------------------------------------------------------------

驚身邊既人活得比自己好，呢個都係一種心理壓力。

薯仔自覺一生都算夠運，細細個已經感受唔到乜野叫讀書壓力，讀差學校時無啦啦會名列前茅，轉去間好時又會自動適應，會考高考都有預期成績，除左會考原校升讀呢樣野曾經有少少憂心過外(但係，我都係無任何plan b，無乜野親朋戚友陪薯仔聽成績搵學校)，入大學，大學畢業，全部都係無驚無險，直至有一份工作，先至驀然回首，發覺，原來自己活得真係幾好。

當然，中環人，有好多做i-bank既人，計人工既，當然無得比。。。薯仔亦刻意唔去諗呢d。。人應該知足，唯有知足才可常(嘗)樂。

如果淨係望朋輩，薯仔係同佢地無野好比，亦都唔需要靠旁門左道去pump自己既財富去比較，所以無乜呢種壓力。。。。但係，如果當有一日，身邊個個朋友都話去食tea時要去peninsula，食飯要去grand hyatt，咁薯仔既諗法又唔知會點呢？

去到呢一刻，我依然覺得和民已經算係幾貴喇播。。。。

-------------------------------------------------------------

打到呢一刻，突然收到舊情人一個sms，想相約一見。。。做乜事？ 薯仔唔係一個記仇既人，唔想報復，但係都好記得你點樣飛我，我個心痛左幾耐。。。

未敢回憶，不敢忘記

六四發生時，薯仔還是一個未懂得甚麼是民主的小朋友。

甚至乎，在薯仔人生中一大段時間，對六四是忘記了。。。。對六四的印象，是有很多中國人死了，軍隊鎮壓亂局。。。

然而，這些事在中國，甚至全世界，不是經常發生嗎？既是平常事，我也提不起興趣去理 。。。

---------------------------------------------------

直至比較懂事了，知道我們現有的生活，是先人用很多血，汗和淚換來的，所以對世界發生的一切，歷史的轉變開始提起興趣。

再有一日，在大學圖書館裡，百無聊賴的小薯，忽然對中國近代史有興趣了，所以借了一本叫做六四真相的書籍。

書本很悶，很悶。無窮無盡的文字，詳述八九年四月開始的故事。

然而，對這本純以文字堆砌而成的厚書，薯仔未敢放棄。。。。仿佛，書裡所述的每一個學生，每一個領導人，都是薯仔身邊的朋友，敵人。

讀到學生因為學潮被莫須有罪名，定位為動亂時而發動大規模示威，小薯心裡叫一聲好!

讀到全國各地聲援，罷工，小薯心裡興奮得好像那個極之貪腐的中共，會真的被學潮所壓下而更換領導人，改革一樣(奇怪，小薯從未想過，會有政黨等去挑戰中共)。

再讀至學生絕食，一個，又一個，再一個與薯仔年紀相若的學生，又或者是，比我早十多年出生的朋友，因為絕食而倒下去。小薯的心痛了。

跟著，將到六四的時刻，小薯知道大難臨頭，心裡叫他們快走，快走! 或許，此刻的中國人還活得苦，但你們可是中國，我們的中國，的希望啊!

小薯的眼角，不經不覺濕了。。。。

------------------------------------------------------------------

之後，薯仔搜索著，一個個當年的記錄，一個個片段，令薯仔不只一次落過淚。

哭，是因為心真的很痛。

"人民軍隊愛人民!"現在，耳邊就響起當日在北京城外，一班手無寸鐵，聲嘶力竭和絕望地喊著這句口號的學生和市民，懇求中共的軍隊，不要入城。

他媽的，一個有血性的人，尤其是中國人，看見這個場面，能夠不動容嗎？

另一個片段，是一個黑夜，背景是我們祖國引以為傲的天安門廣場。片中，影著的是一個薯仔直到現在都還佩服的人。他，很可能是一個大學生，在一個槍林彈雨的夜晚裡，他伸開雙手，嘗試以他的血肉之軀，阻檔那笨重大坦克的去路。那坦克的駕駛員，無論閃左，閃右，都躲不開這位青年；比他那無比的勇氣擋著。

只有在那夜，坦克是弱者，而被理想操控著的身軀，才是強者，強得在十多年後，令遠在香港的一位男孩流淚。

-------------------------------------------

很多比薯仔年少，又或同年紀的人，已經對六四無甚感覺。

我並不反對朋友持相反意見，甚或贊成六四清場。。。只要你們能夠好好去認識這段歷史已經足夠。。。如不認識，請細心閱讀以下文字，就當成是當日的學生所寫的吧。。。

-------------------------------

我們愛國，愛得比現在香港的所謂愛國商人都要深。即使如小薯，雖然對中國很多人(如馬力)和事(如北京偽DISNEY)感到羞恥，但是我們都期待中國會有強大的一日。

愛得深，越讀得多書，懂得越多，自然對國家的種種不濟變得不滿。他們知道，要祖國變得強，中國人過得好，就要變。

要變，但怎麼變？中國人話要變，由1949年開始就說要變，結果大部份時間都是越變越差。

結果，我們都將希望寄託在當時的兩個形象開明的新一代領導人：胡耀邦，趙紫陽。

直到胡耀邦死了，不管他自然不自然，我們的希望像落空了。改革，現代化的希望，沒了。

我們很氣憤，又很痛心。又比甚麼將看著一個我們最深愛如親人的祖國，一步一步的沉淪下去更加心痛了？我們唯有靠自己，希望以對話，以群眾力量，去推動改革。

但我們一心愛國，換來的，是被扣上"旗幟鮮明的動亂"的帽子。

由這刻開始，情緒已經失控，就有如一個你最愛的丈夫/妻子，當你全心全意去愛時，卻比冤枉成是在外邊胡作非為，然後回家下毒，毒死他/她一樣。

雖然失控，但我們依然是想以平和的方式，去令領導層回心轉意。但最終的結局，是我們被我們所愛的人，一刀一刀的割下來。。。。。

-------------------------------------------------------------------------
馬力無錯，六四應該是要寫進教科書的，而當中的取態，並不需要我們去定奪，只需要將當日電視台所播的新聞，一段一段的播出來(當然要包括袁木名句，一個人也沒有死)，便已經足夠。。。。。

中大色情版風波

竟然，呢次風波仲大過有一次用粗口寫標題。

大家，做乜野呀!？

-------------------------------------------------------------------

薯仔覺得果次用粗口寫標題係幾錯。亦曾經同一位中大報社既朋友討論過，我亦得唔出有乜野結論話係一定要用果個L字，而濫用呢個字，就搞到一份代表大學既報紙CHEAP晒。

唔好誤會。我唔係話用粗口起標題一定錯。乜野無文化，有失斯文，大佬呀，大家大學生喇，你唔講粗口，我就唔信你聽都未聽過。起一個標題，大家討論一下點解我用任何助語詞都講唔到個L字先帶到出黎既神緒，又有乜野問題？

幹你娘，粗你媽，呢D就叫登堂入室，一個L字就唔得，要批判，唔係咁樣鄙視爭D成為中國官方語言既廣東話掛。

-----------------------------------------------------------

呢次大學情色版。

唉，又一班未經過世事既YEAR 1去做，又真係好難做到恰到好處。

其實大部份薯仔睇過既，我都覺得可以接受(講同性戀，介紹性行為讀物等)。談性，除左教育外，亦令一份原本無人肯睇既報紙起碼令人有興趣去執一份。

但係無里頭搞話同動物做愛既投票做乜野。。。你不如SET話，如果可以同某一種人做愛，但係做完唔會有人知既，你會揀1)男既STEPHY女既陳冠希2)男既余安安女既吳鎮宇3)男既羅文女既蘇絲黃。。。。。咁樣得出黎既結果可能好過癮都未定。

係，你可以話佢地係做得低級趣味，但係都唔洗咁快判佢地死刑。佢地真係YEAR 1，上年仲係受盡中學保護既中學生咋。。。。

中大所謂領導層話都無咁快就劃清界線，校長連幫都唔幫下口。。。話晒佢地係你既學生，你都唔幫，邊個幫？

呢次，最令我失望既，係中大果堆懶係大公無私既所謂教授。

喪屍效應(zombie effect)

薯仔係某程度上黎講，係一個意志堅定既人。

但係，薯仔曾經都有一次，比一個明知係陷阱既局呃左。

呢個局，就係傳銷。。。。

-------------------------------------------------------------

薯仔一向建議，只要將所有可以出黎抵壓，當係錢既野全部擺係屋企先，就可以去各傳銷公司聽下，當學野。

學既野好多，包括佢點樣攻擊你心理既弱點，點樣佈一個局，點樣令到你難以進退，點樣令到一件好無稽(e.g.比錢去做sales)既事合理化。。。。。薯仔當年都聽到覺得頭頭是道。。。。(當然，自己亦都係暗暗做一個保護罩，提醒自己呢個係一個局)

當年present比薯仔聽既人，已經出晒名，不過出名還出名，唔知佢既名氣會唔會令到佢一沉百踩，再唔可以留係呢行搵食。

----------------------------------------------------

薯仔形容呢個行業時，會用"zombie effect" (原term係一本英文雜誌睇到，不過唔知道果陣時本雜誌係用呢個term黎講乜野。薯仔諗諗下，反而覺得傳銷呢行用呢個term會好襯!)。中文既，我稱之為喪屍效應。

由第一步行入去各傳銷公司既人，就好似一個行入左raccoon city(有無睇過bio hazard？)既人。

想全身而退，有一定既難度。

跟住，做左喪屍既，就會不停咁去咬人，迷失自己。。。。到最後其實自己都要死，係爭在你自己死之前，會殺左幾多無辜既人。。。

-------------------------------------------------------

如果已做左喪屍既，可能對薯仔講乜都聽唔入耳。但係，都好希望你地聽下各位已從喪屍夢中甦醒過來，但係已比鋸到一頸血既"人"，點解佢地唔再做傳銷。

未做喪屍既，記住raccoon city係一個要你出錢先有工做既地方。一份正常既工，係無可能要你比錢先既。

-------------------------------------------------------------

薯仔亦衷心希望，果班明知傳銷係一個局而繼續推廣既，會係收尾幾年得到佢地應得既報應。你地呃一個人既錢，可能令到佢全家萬劫不復。

而果班無知相信傳銷真係可以比到希望佢地既人，薯仔亦衷心希望。。你地醒下啦。。。見到果d要賒要借撲六七萬比你地既人，之後陷入無窮債務中。。你地個心，安樂嗎？

壽司店

閱畢cm兄一blog，才知眾blogger對最低工資發表過言論。薯仔都想寫一篇，但係咁既野寫起上黎就真係要用腦，而用腦絕對唔係以家狀態既薯仔可以應付。

-----------------------------------------------------------------------

諗左一段時間，諗下有乜野比喻可以等各網友明白薯仔既日常工作。結果，我諗左壽司店。

一間嚴謹同傳統既壽司店，請一個如白紙既新人時，通常都會叫佢又低做起，做錯就鬧，要經過好多唔同階段先至可以成為獨當一面既師傅級人馬。由一開始既做清潔，入廚房執野，抹刀，洗米，煲飯到落醋，鍊一舊飯出。。 。。。。要經過好多唔同階段先可以做得出一舊壽司。

薯仔公司就有如一間老牌壽司店，大象係師傅，師子排第二。。。。而薯仔等既小貓小兔，只係可以停留在洗米或者嘗試煲飯既階段。

所以要挑戰狼群實際上係幾唔可能，皆因咁講求階級觀念既老店，你無可能挑戰到比你高級，已經開始嘗試切魚生既佢地(有不和時，獅子亦曾經暗示過比薯仔聽)。

邊個話外資公司無咁多hierarchy?

地產經紀

薯仔年紀尚輕，成日仲覺得自己唔算"大人"。但係當睇見某d人，某d事，好自然會覺得自己其實都唔細架喇。。。。尤其見到一d"服務"我既人，其實係細過我。

其中一種行業，令我感觸良多既，就係見到地產經紀。

----------------------------------------------

十幾年前，當薯仔仲係小朋友時，地產經紀未做到以家咁爛，唔會以家咁周街都係。當年，要買樓賣樓，點會求其行街都會見到地產舖。

薯仔屋企附近有個新樓盤賣緊，呢幾日既地產經紀就聚集在係薯仔屋企附近既位置，久久不散。。。早至九點，夜至夜晚十一二點，都總會有西裝骨骨既人企係到，著得正過薯仔返中環寫字樓既西裝，手拿一個快勞再另加樓盤既宣傳單張，gel得整齊既頭。。。相對黎講，佢地似中環人多過薯仔。

好多時薯仔行過，薯仔爛身爛勢，係屋企落街只會t-shirt短褲，所以佢地見到都知係街坊，唔會搞我。尤其，薯仔個樣仲算細個，點都唔似會係買樓既人。只係有時放工返黎時，執得正d，先會有一兩個黎問下薯仔有無興趣睇下樓。。

就憑我既觀察，我覺得佢地都幾慘。日灑雨淋。身邊每一個人，既是同行，是敵人都是朋友。以家天氣開始熱，但係依然要著得靚，打鈦，粒粒鈕都要扣，真係焗到標晒汗。。。

仲要工作性質就係不停咁食檸檬，百幾二百人黎賣樓，一日都知賣得果十幾廿間，日日都係好大可能無生意，有時甚至連樓盤個promotion完左都自己賣唔到一間，果個月就粥水都無得食。。。

最慘既，係薯仔見到年紀比薯仔細，甚至係細三五七年既都要企出黎搏殺。

有一次，另一大型樓盤開售，薯媽純粹行過，毫無興趣，而行過既地方離個樓盤既腳程都要十分鐘，但係都比一個比薯仔後生既男仔捉住。

薯媽話：我地住附近架咋，無錢買樓架!

地產經紀話：唔緊要啦，睇下都好丫，我地搵唔到人去睇會比人鬧架。。。

咁薯媽見佢咁慘(尤其諗落，自己個仔都係咁上下大)，就用左一粒鐘去陪佢玩。。。而佢亦守諾，無再留難薯媽。

------------------------------

十歲尾廿歲頭就要出黎搏殺，去鬥得咁激烈既一行，明爭暗鬥先搵得果少少佣金，有時薯仔睇見都幾心酸。

尤其，一個咁既年紀既男仔/女仔，鬥心計，鬥sale野，邊夠班老屎忽黎？但係，佢地依然係要靠呢個希望，望住呢棟新樓，幻想住自己真係做到一單生意，而收返黎既佣，可以請男/女朋友食飯，去旅行，令自己，令自己心愛既人開心。。。。。。。。

一棟樓，除左係買樓既人既夢想，亦都係一眾經紀既夢想。

大家，見到年少既經紀叫你睇樓盤時，都唔好咁惡，比少少禮貌，或者比d鼓勵。。。

份糧包乜？

薯條兄一文，睇到我會心微笑，我又試下打下先。

我份人工都係萬零蚊，包括：-

- 七點半起身刷牙洗面然後乘搭有如集中營既地鐵。

- 到達公司後潛意識變身做"中環人"。

- 開電腦check email後再逐個回。

- 幫高層客仔解決工作上既問題

- 幫中層客仔解決佢地手上厭惡性工作既問題

- 以最誠懇既語氣去教導比我低層既客仔。

- 以謙卑既精神應付外在(有時連埋內在)客仔既需求。

- 有需要時，全公司，或全人類既出氣袋

- 有需要時，全公司，或全人類既對講機

- 當然，更加要運用讀近成廿年書既知識去幫公司搵錢。

- 陪笑，營造歡樂氣氛

- 在for reference既放工時間前，要全心全意為公司拼搏

- 在for reference既放工時間後，要肯定做晒今日要做既野先可以走

- 辦公時間外無要求你要keep住check email，但係唔check然後導致有損失既話呢個鑊你走唔甩

- 工作範圍內既，當然自己做

- 工作範圍外既，只要令老細添煩憂，亦都要自己幫手解決。

唉，越諗越灰，唔想再諗落去。。。

命得一條，手得一對

唔知幾時從ak兄既blog見到呢一句，好鐘意。

而呢個情況，剛剛在薯仔身上發生。

--------------------------------------------------------------------

話說薯仔既公司，話細唔細(好多關聯公司)，話大唔大(有幾多個人，要數一陣數晒)，以家市道好既時候，真係d job自己行過黎，即使係老細都唔使特登去搵生意，係生意搵上門然後我地再開價，而小職員如我等，聽到個客話我地收得貴唔睬我地時，口入面就嘆息，個心其實係歡天喜地。。。

當然，我地從來都唔敢推job，接唔接，開乜野價，從來唔係我等小職員話事。

講完廢話喇。。。。唔知點解，經濟係咪真係咁好，薯仔間公司近排接左好多無里頭既工作。。。大既當然唔到我，然而咁鬼多"食之無味棄之可惜"既細job，高grade就真係唔得閒理咁多野，咁薯仔自自然然要食呢堆"雞肋"。

同我同grade既人中，david已經殺入直路等升職，日日跟住高grade如老虎同豹等出出入入，然而薯仔同kate都仲係浮浮沉沉。還好既係，薯仔起其他人心目中還算似樣，kate就真係陰公，到左以家雞肋都無得食，食黎食去都係雞頭，仲要比各狼群狂點。。。。正所謂，佢以家正係。。。。日日柄鑊甘，刀刀插入心。。。

除左薯仔外，另外仲有兩個高薯仔少少grade，勉強仲算係低層人士既同事，rachel同karl。到左佢地既level，雞肋就好少再放落去，反之，佢地要學下點樣去跟一d大job，所以都係幫唔到手。

其他細既就唔好講，kate叫做食雞頭，佢地算係雞毛都仲未有，反而有時仲要靠薯仔同kate一齊分d雞骨比佢地咬下。一黎呢班細仲未熟識呢間公司既運作，二黎要取得各高層既信任並唔係一朝一夕既事。

咁既情況下，突然間，我由本來無乜工作，變成要跟住好多雞無蒜皮事。尤其，david已經脫穎而出，佢原本跟開既低層工作，又突然間卸咁好多落黎我果度。。。。正所謂。。日日做到無停手，邊有休息既時候。。。

之後既結果，係唔好話打blog，留言都唔得閒覆。。。。。

所以，各位兄弟既留言，小弟遲下先再另文再覆。。。

薯仔工作間

為左之後寫得好好睇睇，等各位看官明白薯仔寫既辦公室逸事，薯仔呢篇就寫下公司內既政治狀況。

之前介紹過老虎同狼女。叫得老虎做老虎，當然上有獅子同大象。

大象已經不理世事，有事只會搵狼群以上既動物（即係狼女都無份)。低層員工既事，甚至係升職加薪佢都唔理，所以薯仔都唔洗點講佢。

對如薯仔等既小貓黎講，獅子手操我小貓群，甚至狼群既生殺大權。然則，薯仔呢行既人材短缺，獅子近年來未試過殺佢既寵物，但係見到唔順眼既，虐玩一下都係少不免，然後由得佢地自然流失。

不過，獅子高薯仔唔只十個grade，日常工作對薯仔影響唔大，佢對薯仔既認識只係來自老虎豹狼狗等等。。。

獅子之後就到老虎。公司發展得快，尤其係近呢幾年，所以獅子一個人都睇唔晒咁多個小職員，公司內既行政工作要慢慢下放比老虎，咁樣獅子先可以落力去搵生意。老虎就係咁既環境下，隱約有種宰相既味道。獅子同老虎都少一齊接job，皆因要比老虎"野生訓練"，當係一個個考牌試。

大象，獅子同老虎就係咁形成公司內既決策層。

獅子要比老虎獨立訓練，咁獅子都要搵返d助手去幫拖。

獅子主要係搵豹同埋之前出過下場既燊哥。燊哥同狼女級別差唔多。

老虎日常工作，除左自己跟job外，有時好複雜既大job，仲要跟大象搵食。老虎既得力助手就係狼女。

其實獅子唔係太鐘意老虎，不過無將可用，亦逼住要俾老虎上位。

大致上，公司上既工作就此形成兩大勢力，一以獅子為首，一以老虎(同大象)為首。

至於狼群，由於唔似得燊哥同狼女咁深得寵信，係公司既年資無咁耐，佢地既影響力係唔大。有機會先再介紹佢地。

至於最底層當然係有一堆小貓小狗，同埋有一d小老鼠(註：對大象毫無影響)。薯仔同一眾低層人士關係向來唔錯，小狗小貓小老鼠等都起碼表面上稱兄道弟。

薯仔同另外某d小貓因為第一份工就係係呢間公司，所得到既待遇係有少少優勢，而我地呢種動物更加係獅子老虎既寵愛對象，皆因公司傳統上係鐘意由小貓培養上至獅子老虎咁既階層。

david，kate同薯仔就係咁既人。

david已得獅子果條line既寵幸，薯仔就得到老虎果邊既關照。kate就比較不幸，兩頭唔到岸。

-----------------------------------------------------------------

上面係簡化左，因為雖然大致上兩大勢力圖係咁分法，但係job都係會有唔同組合。

例如，我都會跟下豹同燊哥搵食，而老虎都周不時搵下david幫手，不過好明顯，一講到要搵信得過既人去做野時，尤其個job係令到自己生死尤關時，各自就會就位，搵返自己信得過既人。。。。。 。

暫時，薯仔係呢個森林下，形勢唔算差，只要老虎一日保持影響力，薯仔依然可以係佢既庇護下成長，但係計到前途，就一定無david咁好，因為係薯仔仲未領略到乜野係工作同辦公室時，david已經成功地係眾高層心底下留低良好印象。。。而薯仔一開始時既壞印象，就係獅子心目中長久不散。。。

求生術

薯仔係以家公司做左一段唔短唔長既時間，因薯仔做事得老虎歡心，老虎亦較為放心將d比較technical既工作比薯仔。

ak形容自己係貓，咁薯仔都唔知自己係乜。。。皆因一向無權無勢，唯一靠山就係老虎，然而薯仔亦深知自己係老虎心目中微不足道，所以從不敢妄生事端，對老虎實話實說，一副忠臣既模樣，有時更特登講錯野，顯得薯仔對老虎有絕對信任。

尤其，老虎係不久既將來將可以脫離獅子既掣肘，自立門戶，需要一班可以信得過既手下，所以近日更加係立心栽培薯仔同某些低層人士，等老虎自己將來有兵可用。

------------------------------------------------------------------

薯仔有時都會諗，其實辦公室都未必係ak想像得咁黑暗，凡事兩面睇，可能佢地都無乜機心，大家都係為做野，或者可以做埋朋友呢。。。。。

實際上，當然唔係啦。

老虎最得力既助手正係狼女，一個薯仔對佢已再無好感既人，而佢亦因為薯仔聯同某d低層人士投訴過佢既工作態度，加上薯仔明顯地得到老虎既寵信，狼女對薯仔亦多加提防。不過，由於老虎既關係，大家跟開既job又差唔多，狼女又算係我上司，我同狼女表面上依然係合作無間。

講完背景，故事開始。

一日，狼女外遊，老虎突然召薯仔過虎穴，要薯仔做一個job，而個客係狼女跟開既。

唔知係有心定無意，老虎強調呢份job唔難，無需要狼女插手，明示要薯仔可以直通老虎，唔需要經過狼女。

狼女當然唔知情。

不過狼女花係呢份job既前期功夫亦唔少，咁樣比薯仔攝左位當然唔抵。

老虎亦無理由當面對狼女講"呢份job唔需要你跟"，所以狼女雖然眼見薯仔為呢份job左右奔騰，明係唔預佢玩，佢亦心知肚明自己唔應該過問，不過依然事事擺起上司姿態對薯仔所做既一切指指點點。

加上，個客一路都係聯絡開狼女，狼女亦自動請纓，明係幫薯仔做client relationship，實則保持自己對呢個客既影響力。

老虎眼見如此，都唔會理佢，老虎最終既目的，只係"get the job done"，其他一切都係次要。

講多次，薯仔只係一隻微不足道既棋子。無左薯仔，仲有其他等緊上位既低層小職員搖頭擺尾等老虎既垂青。

--------------------------------------------------------------------

如果故事係咁完，我都算。

問題開始在，狼女有心無意間係到想點條黑路我行。

皆因隻job佢已無權過問，佢做既只係同客傾。佢對呢隻job既唯一影響力，就係佢作為我上司既身份，從旁比advice。

薯仔同老虎個grade爭太遠，事事問老虎一黎只會惹得老虎煩厭，二黎即係明飛起狼女，增加狼女對我既厭惡感。。。所以，薯仔有事唔明都係問過狼女先。

有一次，得我同狼女兩個傾野，狼女係到不停咁點條黑路我行。。。。。唔可以話教我一d錯既野，只係專講一d偏離正道既做法。。。如果跟足，實俾老虎柄到暈。

如果薯仔之前唔係做過類似既野，我都可能聽晒狼女話。只可惜，佢估計錯誤。

呢個時候，狼女一輪咀咁帶我行歪路，我就慢慢咁諗，點樣可以令自己避過呢個大劫。。。皆因佢教到，唔可以唔跟，否則如果老虎唔得閒理我，隻job可能都係比返狼女睇，我唔跟佢講又會比個位佢去高層面前造謠生事。

薯仔知道老虎八掛，加上狼女同老虎既坐位距離不過五六米。。。肯定老虎係位後，薯仔開始大聲咁問問題。。。。我一定要老虎聽到我問乜!

問完後，得到個答案，反覆咁諗都係無可能跟狼女唔會錯。。。。。。我就行過去老虎到，誠徨誠恐咁問多一次呢個問題。。。再將狼女比我既答案講一次。。。而竅妙在於，我無講過話係狼女教我。。。

老虎第一句講。。。"nonsense!"。。。然後五秒內打發我走。。

------------------------------------------------------------------------

雖然老虎乜都無講，但係佢forward下一個關於呢隻job既email時，cc埋比狼女，然後入面只有一句，"薯仔，做野。"

老虎開到聲後，從此，狼女唔敢過問呢隻job既任何事。。。。薯仔亦樂得清閒。。。

宗教信仰

薯仔係乜野都唔多信架。

無論東好西好，薯仔為左保持自己既價值觀，所以唔肯去投入一d宗教又或者道理。

有時口邊講一兩句佛偈，又或者搭一兩句耶穌金句，只係為左玩，或者以佢地超凡既智慧道出人生既大道理，去安慰自己安慰人。

為左保持自己應該算係低等既價值觀，唔肯接受人地咁多年黎既智慧，有時我都覺得自己幾有問題。

另外，我覺得投入去信某種宗教，個人真係安心好多。

有時，睇鬼古，我都心諗，如果自己有日比鬼壓，郁唔到，我應該好似果d師奶或師傅咁講去唸經，亦或希望耶穌黎打救？

各位信途，各施各法，不過最後總會無事。但係如我咁既唔虔誠既人，耶穌佛祖觀世音普薩又點會得閒黎救我。

除左以上外，相信宗教道理或智慧，做人遇上挫折亦會較為開心。

信耶穌，返教會既人，係好人既機會率點都大過唔信既人。

--------------------------------------------------

但係以家，即使有時會徬徨無助，薯仔依然係覺得開心架。

薯仔明白唔應該殺生呢個道理，所以有時見到屋企有隻蟻，我都會用張紙放佢出窗外面，唔會殺死佢。(well，係高樓大廈既環境下，佢可唔可以保得住條命仔就要睇佢造化喇)

開心，係因為覺得自己(well，可能淨係自己先會覺得)做左件好事。路不拾遺，將執到既手電還比個巴士司機，果種滿足感未必係賣部機出去既幾百蚊換到。人地找錯錢，要諗清楚佢既過失會唔會令到佢要負責任。買老麥時佢唔覺意比多杯雪糕你，薯仔會"hehehe"咁行開，但係去PK買野佢找多一千幾百比你，收銀個姐姐/嬸嬸可能要白做幾日先搵得返D錢，所以薯仔都會笑口噬噬咁同個阿姐講返。

己所不欲，勿施於人。

以上唔係宗教教薯仔既道理。做人光明磊落，活得自在，人然會開心，係薯媽細細個教薯仔既道理。

薯媽對薯仔黎講，比起耶穌更令薯仔信服。

假期過後

首先，多謝各位係薯仔放假偷懶時仍繼續支持本blog既朋友(我發覺，原來呢幾日唔寫blog，個瀏覽率都係差唔多)。

之前睇過一d文，話長假過後，好多在職人士都會覺得病病地，因為唔習慣放假同返工兩種唔同既生活。薯仔都係，次次放完長假返黎，尤其係出外旅遊既話，會覺得仲想死，返親工都係擘大隻眼等放工。

-------------------------------------------------------------

假期時，同一d朋友相聚一刻，自不然會傾埋各自職場上既際遇。

時間越耐，各自既際遇會越差越遠，甚至乎，當日出生入死既朋友仔，可能會有埋代溝。

有時經過當日踢過波既球場，出沒過既機舖，泳池，車仔麵檔，都有種感覺。。"唉，原來時間過得咁快。"

好彩，以家同大學既朋友仔仲可以傾得埋，但係中學既，已經唔明點解薯仔返緊一份相對上薪高糧準既工仲唉聲嘆氣。

都係返學既時候好。中學時，放呢d長假，一定約埋圍內既幾個老死，十日假起碼踢兩日波，游一兩日水，打牌，打機，即使係屋企都會連線打下機。。。精力，耗不盡。

以家放呢個"難得"既五日假，頭一兩日一定要訓，訓返對上幾個月無訓既時間，訓到覺得自己終於係一個人，先會諗下要做d乜。。。(當然，仲會有同事係要返公司做野)

認同渣老闆話過，老細係真金白銀買我地返工既時間。。。可憐既係，打工仔如我，捱生捱死，到最後都係要等一年得幾次既長假先有種"時間係自己手"既感覺。

思緒凌亂。。。請見諒。

點解要返工

對好多人黎講(包括薯仔)，返工緊係為左份糧啦!

但係，純為左份糧而返工，其實係幾慘架。

一星期中，工作既時間佔去"清醒"狀態中既薯仔大約一半。如果工作純為左份糧，咁即係人生有一半時間都係"奴役"自己。

薯仔雖然職場唔算事事如意，但係暫時黎講返工還算是快樂。

一黎，辦公室內還算有一兩個朋友。二黎，返工所吸收到既知識，真係令薯仔大開眼界。

有時見到有d同事，因為上左年紀又好，仔細老婆嫩又好，等供樓又好，日日比人少，少到媽媽都唔認得依然唯唯諾諾。。。。。。返工係咁，咁做人都唔慌會開心得去邊。。。我同自己講過好多次，我一定要有bargaining power，到將來既老細係會因為"尊重"我既能力而唔敢DG我。。。

工作上要有滿足感亦都要有一個開心既環境。睇見ck同渣老闆既blog，寫佢地工作上既瑣事，就好似自己真係有個朋友係個球場都踢緊波，而我就係一個普通既球迷，係旁邊喝采，羨慕佢地既生活。。 。因為佢地做每一樣野都會反映出佢地盤生意上，而我，都仲係要做好多好無謂既事。。。我諗佢地返工時，應該會有一個幾愉快既心情？

---------------------------------------------------------------------

有同事話，佢未轉黎以家既公司前，雖然做既野係悶，工作時間係長，但係佢每朝返工都會覺得好充實，係會期盼佢自己今日又可以做到幾多野。。。

我諗，身為打工仔，起身時可以期待自己既工作，又係另一種blessing。。。

(月尾，剛出糧，有所感觸)

特首趣談

連我屋企人呢堆政治冷感，平日睇電視只會睇無線劇集既典型街坊街里，都會對特首選舉有一番評論。

淨係呢點，梁家傑已經成功左。

----------------------------------------------------------------------

呢次選舉最大既諷刺，係大家都會對兩個候選人評頭論足，大家各有見解。。。。。。就好似睇緊台灣選舉咁。。。。。係"台灣選舉"。。。。

大佬呀! 以家係選緊"香港"既特首呀! 即係我地住緊既香港，即係我地交緊稅既政府，即係直接影響我地生活既"最高"領導人呀! 投票既地方雖然遠左D，但係都叫做香港架!

點解香港人可以咁抽離？點解我地睇緊佢地辯論時，會無辦法參與？(阿Q話：傻既! 好彩港大中大既民意調查打比你，你咪可以發表下意見囉!) 莫非我地香港人已經習慣左去"適應"，去接受，而唔係去做決定？

係，無錯，公投點都好，贏既一定係曾生，但係重要既係過程。可能你既另一半條命一早已決定左，但係無拍過拖，你甘心嗎？

多謝梁家傑。係無奈既政治環境下，佢幫如我既香港人出左口氣。

梁生，我見過你幾次，我真係想同你講聲"多謝晒"。。。。只可惜，薯仔太怕醜。。。。

----------------------------------------------------------------------

曾生當選既新聞，老實講，我無睇。

因為我唔想睇。

我唔想睇，唔想知，所謂代表緊我既人會係D咁既人。。。。點解咁多對香港無認識既人會代表緊我。。。。。。。點解會有咁多只想諗住羅著數既人代表緊我。。。

功能組別，老實講，我遲早有得參與，遲早會有我既一票存在。但係我唔希罕! 我希望有既，係會有一個特首，會起碼表面會用心聆聽。。。。會因為怕保育人士唔投票比佢而暫緩拆天星，會因為怕老人無所依而增加佢地既福利，所為扶貧唔係羅三五億出黎但係都唔知去左邊就玩完，所謂教育改革會因為怕家長反對而做到"以小孩為本"。。。。

向世界出發

今日有時間，睇返呢幾日用電視錄低左既向世界出發。

唔知係DHL出既意思定係無線定左個IDEA再搵DHL贊助，呢個節目質素之高(雖然曾志偉呢輯既對答有D九唔搭八)係無線少見。

---------------------------------------------------

人點會開心？

對上果次，開心到癲既係考一個無把握既試然後合格，振臂歡呼。

會窩心既，係會有一個人，當你忙到痴肺一日走幾場時，整一個飯盒帶黎比你食。

會令自己笑既，就係生活著，面對種種突發問題，慢慢去SOLVE，去拆掂佢時，覺得"活著就時精彩"。。。。

開心，追求乜野，欲望，係好玄既問題。呢一刻薯仔努力工作，為既，除左自己既將來，仲要令身邊既人覺得"安樂"。唔好話係令到佢地"買野食野唔洗睇價錢，出街一定搭的士"，而係希望佢地可以"唔想煮可以出街食，有病可以睇醫生，閒時可以去旅行"。

屋企越多人，人越齊，要做到以上講既野就越難。

睇火鳳，有一段講到司馬懿不停咁講，"活著多好"。有時坐係到，望下周圍既野，會覺得自己，都"幾好彩"丫。

好彩既，當然以家仲係生存中。

其次，就係自己無病無痛。

再者，係自己仲睇得/聽得/聞得/行得/食得/等等。。。。

有時睇見好多人係好慘。我唔可以想像自己睇唔到野會掂。我覺得盲左後可以重新振作，又或者有肌肉萎縮症既人可以堅強面對人生，係好了不起既事。

所以大家，股票贏左d又好，賭錢贏左d又好，行過見到無國界醫生/orbis等等，希望大家可以捐少少錢。

始終，大家開住部電腦，有時間入黎睇薯仔既blog，已係幸福既一種。

"我想quit呀。。。"

某夜辦公時間後，薯仔係低層區域，一個人默默苦幹。

做得入神時，新哥，一個薯仔頗有好感既中層人士，係薯仔面前行過，問薯仔，"咦，做咩仲未走？約左人？"

薯仔一副無佢咁好氣既樣，同佢講，"要做野架。。。"

突然，新哥變左一個愁樣，對薯仔講，"我想quit呀。。。"

-----------------------------------------------------------------------------------

新哥係薯仔公司一個頗有前途既中層人士。在公司內做了四五年，辦事認真，高層下放既job係佢手上會辦得妥妥當當。即使稍有閃失，亦睇得出新哥已盡全力，都唔可以怪佢。

新哥甚得眾(亦即係獅子同老虎兩人)高層喜愛，有機會亦想將佢推上位，成為部門內另一奮鬥目標。而低層人士如薯仔等對新哥亦有好感，皆因明白佢用心用力真係想教好d細既，語氣又好，亦努力維繫部門內各人士關係，為大家"表面上"良好既工作氣氛出很多力。

薯仔與其他眾低層人士，從未懷疑過新哥在公司裡的前途。未升上高層，只因時辰未到。。。。

獅子在appraisal時，亦對薯仔講過，話希望薯仔可以從新哥身上學習，因為新哥行緊既路甚有獅子當年既影子(除了獅子當年脾氣極度暴燥外。。。)

點解一個如新哥既人，公司裡頭全心全力，都會有此等說話？

------------------------------------------------------------------------------

"無。。。。都係近呢兩個星期先有呢個諗法。。。"新哥再講。

新哥表面上很值人羨慕，公司裡有前途，外表不俗，有等結婚既女朋友，家境亦唔錯，人品又好，總之就似舊式愛情小說裡，會被表妹暗戀的"完美表哥"。

"點解呀。。？"薯仔同新哥平日無甚來往，公事外並無接觸，突然對薯仔講呢d私人野，令薯仔受寵若驚。

"突然覺得。。呢份工好唔適合自己。"新哥答我。。。查實我諗九成九年青人(新哥都係大我幾年嗟)返工時都會有呢個諗法，不過新哥已做四五年，以家先諗又好似。。。。。。

"哈，竟然做左咁多年先知。。。"新哥接道。

"咁又係。。我有時都會想走，我都明獅子係幾難頂既。。。。"我答道。我都唔知講咩好。。。。

"唔係人既問題，我覺得份工本身既性質問題。。。"

"即係，返工時，你望到你上面，你會覺得你想做佢個位。但係，我今日都同個高層講，話我唔想做你。。。你又想唔想做我？"新哥問我。我搖頭。我覺得新哥壓力太大，有時做到天光都要被獅子召入房"教導"。。。。 再諗，薯仔點做，都無新哥咁勤力。。。

"hmmmm。。。。但係你諗清楚喎，你走左，你都識同我講，大家來來去去都係做呢行架咋喎。。話晒呢間公司待我地不薄。。"薯仔之前都同新哥傾過搵工問題。做中環大公司既人有呢到好，我地唔點怕比高層知道我地既離心。佢地都好明白，我地呢種人工唔高既小薯仔，出到去真係有價有市架。。。我地肯講我地有不滿，總好過粒聲唔出去遞信。。。況且，公司內個個都似會走。。。

"唉。。 。。。"新哥嘆一口氣。我突然醒起薯媽係薯仔細個時成日講，男怕入錯行，女怕嫁錯郎。。 。新哥以家真係似前者。。

"無野無野，我可能都係發下脾氣嗟。。。"新哥之後自己行開。。。

----------------------------------------------

各位朋友，大家揀工時真係諗清楚。

錢當然重要，但係興趣都好重要。

薯仔格言：
人工高，會令你唔捨得份工
做得開心，會令你有動力去做份工

當中之分別，差距十萬九千里。。。

朋友A

幾日無寫，收視(原本已經唔高)大跌，係時候寫返少少野。
--------------------------------------------

幾日前，如常地同同事晏奏去食LUNCH。呢次係由中環行到去近上環既舖頭仔到食。

食完後，慢步行返去。行行下，突然見到一個熟悉既身影。

係朋友A。

---------------------------------------

薯仔唔係一個成日望人既人，行街身邊唔同友人話見到唔同明星，我往往都緣慳一面。呢次撞到，純因朋友A既打扮，頗突出。

試想像，地點係環球大廈附近，正係快餐店林立既地方。

放LUNCH時間，人頭湧湧。。。。而出入中環得多如薯仔我，已經可以從衣著睇得出其他人係中環既職責。

如薯仔等後生細仔恤衫西褲一件冷衫既，就知係寫字樓默默耕耘既小職員。

一身黑色FORMAL套裝，手羅一個GUCCI(唔會有人羅LV架喇)，面化淡粧一臉職業笑容卻流出處處警戒神色既，應該都係某中環辦公室既高層。

有返三四十歲既女人，聯群結隊，著既衫唔會好靚但總算企理整齊，成班如八婆等大聲講細聲笑一齊蒲大家樂等地方既，應該都係秘書團。

不過以家勁眼訓，唔打得咁多住，如果唔係打到天光都未打完。。。。。講返朋友A。

朋友A一身既打扮，有如天水圍街坊。。 。。。T-SHIRT短褲光頭帶一副唔稱身既眼鏡，同佢中學時既朋友一齊係中環到行。。。。。果種感覺，有如LV內擺著一個環保購物袋。。。
--------------------------------------------

朋友A曾是薯仔既BEST FRIEND，初中時經常一齊玩。不過大家興趣唔多同，志向亦唔一樣，之後唔同班就漸漸少聯絡。

大學時，雖然大家讀同一所大學，撞過幾次面，不過都淨係HI-BYE，講下閒話就算喇。

之後朋友A潛心向學，從佢所學既學科鑽研得唔錯。不過佢讀既唔係商科亦唔係純科學，所以讀讀下，個人亦比較變得"怪"--香港人覺得既怪。

例如，佢原本係一個聰明人，思想敏捷，薯仔讀書辯駁肯定唔夠佢黎，但係佢寧願捱世界都唔肯入中環呢個遊樂場。

原本可以有萬萬聲既人工，生活舒適，但係寧願以家做一份TEMP。。。呢個，亦係薯仔，以家搵少D都覺唔夠洗既中環人，完全想像唔到既。。。

--------------------------------------------------------------------

睇住朋友A同佢朋友，係我眼前掠過。。。不由得諗返起仲未夠十年前，大家一齊玩既日子。。當日既死黨，大家以家行既路會咁唔同。。。佢可能會鄙視我等中環人，而其他中環人亦可能笑佢傻仔。。。

望住佢，我再望一望身上既冷衫，領帶。。。。。

嘿，大家也在角色扮演麻!

作賤自己

從兩位朋友，分別聽到"作賤自己"呢句說話。

講既唔係薯仔，而係佢地自己。

---------------------------------------------------------

第一位，係聽佢講話要等錢洗，所以有時連晏都唔捨得食，好多時都係一日食一餐。

點解會咁慘(我自己如果唔食早餐果日朝早已經想喊，唔好話連晏都唔食)，我都唔知。搵錢都唔係少，佢數比我聽既野我聽落去都唔洗令到佢咁窮。

"如果你真係咁窮，咁你唔好買d咁貴既野送比你老母啦。"我話佢。

"我作賤自己，都唔會作賤我老母既!"佢答。

well，anyway，呢位朋友雖然做既野有d戇居，但係都好令我欣賞，話晒，佢淨埋d錢都係用係佢有需要既屋企人身上。。為左自己父母兄弟而自己死頂，我慶幸識一個咁既朋友!

--------------------------------------------------------------------

第二位，聽落慘好多。

細細個對工程有興趣，大個就入左去讀engine。

engine有幾慘淡，相信大鐵鎚既blog都有講過下。

只不過係以家做左一陣engine既placement，就已經同我講。。

"喂，薯仔呀，你話讀financial planning好無？"

"你讀，唔好喇掛， 你都唔似" 一個由頭到尾都成個"賤"仔既人，又幾難想像佢去sale野。

"唉，咁唔係去做，去讀下識下點樣理財都好丫。"佢感嘆。

"乜你咁快無晒理想架？engine仔唔係心高氣傲d架咩？"我問。想當年，我還未踏足呢個社會，我仲對呢個社會好有幻想，亦諗過做自己鐘意做既事。

"做一陣野，仲有乜野理想丫。。。。"跟住，佢列出一堆聽落去悶死但係又會搵到一兩皮既工作。。。。。

跟住，大家就講下經濟狀況(看! 讀書時認識既朋友真係最好，大家都好坦誠)。。。佢話，條女成日都話佢"作賤自己"，唔肯買野比自己。

跟住，我望一望呢個三五個月無見過既朋友，佢一身既打扮。

"唔係丫，你見縷都幾新呀。。"我問

"係呀，之前係baleno買既。"

再望。。。對鞋，咦，好似兩年前見佢著緊架喎。。。佢見我望下望下。。佢笑住好叻咁比個袋我睇。。。

"呢個袋我用左四年喇~!"

跟住聽落去，原來佢覺得踏車過海都係好貴。。。仲要留返d錢買藥比佢屋企人食同交學費。。

唉，搵日都要請佢食餐飯，成日食快餐都唔掂。

-------------------------------------------------------------------------------------

薯仔出身寒微，識既朋友多數都係一樣，唔住公屋居屋既已經算係有錢，一日屋企未洗羅綜緩既我都未視之為窮。

當然，窮唔窮唔關我事，唔熟既當然唔會問我借，但係熟既唔洗問我都會主動問佢你有無需要。

人在中環，生活質素除住搵既錢多而好左，亦令我一時違忘當日係大學一齊捱窮既生活同感覺，點樣一齊食埋狗都未必食既飯。。。。

朋友，幫我未必幫到你，但係，頂住呀!

傷信

我自知乃一介細薯仔，實無權力可言，固工作上亦無甚要求，亦不曾望過分享半點權力。

然而，作為一位下屬，基本的尊重，信賴，還是要的。即使是兩個陌生人，我們都要尊重大家，更何況是平日出生入死，刀光劍影槍林彈雨的戰場，我是希望大家對我會有一種信賴，亦正如我相信大家一樣。

但是今日薯仔發覺，原來自己在一獅子前的信譽是這麼的低，我好心向你提出忠告，卻換來獅子向森林內外的雄獅猛獸甚至要問隔離一隻小貓才肯稍稍相信我既說話然而亦不肯接納我既意見仍然一意孤行到左今日親信面對同一情況才轉變對策。。

嬲，都無野好嬲。我唔驚佢炒我，中環人甚缺，況且我工作質素雖不算頂尖卻一算是一位稱職的員工。

好好學識呢個道理，將來面對其他老細/同事時，會有更好的應對。。。

放我半天假，若未太清醒，再放半天假

詐病，薯仔相信大部份打工仔都試過。

薯仔對道德觀念一向模糊，有時個人慶慶地，就會做一d如詐病既事，去逃避，或者，係去休息。

試過，因為工作間太得閒，無野做，但係個個都扮忙，係呢種虛偽既氣氛下，個人嬲嬲地就自己行入去老細房。。。敲門。

"老細，我有d唔舒服，我想走先。"

"唔"老細一向爽快。我懷疑如果有朝一日我遞辭職信，佢都係咁既反應。

離開中環，搭叮叮去銅鑼灣。薯仔鐘意銅鑼灣，佢無旺角咁雜咁多人，會多一d感覺上純樸d既地方。加上，當薯仔仲係一舊天真無知既薯仔時，好多時間都係度過。

撞岩有一件盛事舉行中。薯仔企係到欣賞，羅出個電話，似一個遊客，影低一張張相。

奈何呢個遊客，係著住西裝既遊客。

辦公時間下的銅鑼灣，遊人不多，甚至有種渡假的寧靜。

站在皇室堡外，深呼級，諗下自己想做乜。

"喂，係我呀。我以家出左黎銅鑼灣，不如今晚睇場戲？"人，終究係怕寂寞。諗諗下我都係搵個人出黎陪下我。

但係無乜朋友會呢個下午兩三點咁得閒出黎。我自己仲有好多時間要打發。

霎時間，想回到過去。

往日我經常去時代既機鋪，但係以家執左。我求其行去一間機舖，尋求返往日果種"挑機"既好勇鬥狠。

舊時唱錢會睇住睇住，以家無乜呢種感覺。

羅住一袋，廿個一蚊，係機舖內行來行去。

不過，以家出既機，都無乜邊部係識打。

自己一個人係到行黎行去，亦難免有種孤獨既感覺。

鬱悶既心情揮之不去，玩唔夠一陣就離開呢個地方。

"若是悶極了對鏡說話，多麼的孤單也不必怕"。。。。

短篇小說

若干年後，地球突然遭受外星人攻擊。

外星人來自銀河系外一大星球，名為浩星。浩星的萬家看中地球的萬變的風景及資源，所以派出自家軍隊侵佔。

浩星和地球比較下，地球的科技，智慧明顯有差別。浩星一開始侵佔時，地球各國大軍還各懷鬼胎，各家自掃門前雪，各自抵禦敵人。到了地球人明白他們的軍隊實不足以抵擋外敵，無論聯手與否，地球科學與浩星比還差一千年距離時，地球人努力求和。

然而，浩星人明白地球人有智慧，靈性，要他們乖乖做奴隸不抵抗是不可能。不過，一次過消滅人類這生物又過於可惜，怎麼說現階段的地球人，是一種很難得的生物。萬家經過研究後，發覺如剝削人類互相溝通及累積知識的能力，人類的造反能力必大打折扣。

如是者，萬家嘗試將地球人的記億，所有記億洗去，要令他們忘記甚至曾經有地球這回事。

萬家以他們現有的科技，將晶片改良至可以植入人腦內，然後強行"重組"人類的腦袋。

晶片雖然是平價貨，但終究是要錢的。加上強行重組人腦，使之重生，失敗率極高。萬家決定，只為地球上一百萬看似強壯的人做這"手術"。剩餘的，當然是被屠殺掉。

做完手術後，還可以正常地生存的，不過一千人。其他的不是死掉就瘋掉。

萬家很滿意他們的"戰利品"，因為人類除了有如寵物般的觀想價值外，萬家想到，人類是可以幫助萬家的日常運作。例如，人類可以做一個運輸者，清潔者，等等。當然地球人未必有機器般準確，但人類的變通能力甚至乎維持人類正常操作的成本，不是機器可以相比的。

久而久之，萬家還發覺，人類還可以用作為萬家"增長財富"。

萬家開始為人類度身訂做一些比賽，例如打鬥，賽跑等。從人類的比賽，萬家開賭，為一眾其餘浩星人提供娛樂。浩星人為這娛樂很著迷，皆人賭人不同其他賭博，賭客可以從那地球人身上的特徵，判斷他們應勝或負。這似有還無的感覺很吸引。

原本人類只配做奴隸或寵物，現在已變成生財工具。萬家，或者從萬家買了地球人的其他浩星大家，對地球人的待遇好得多，因為怕他們會絕種。各大家開始培訓出各種為比賽而生存的地球人。打鬥的，會為他們訓練出肌肉。賽跑的，就要在乎短途或長途，作出不同訓練。

再之後，各大家為人類訓練及交配時，發覺某些血統下的人，天生有某些優勢。從而，浩星的人發展出血統學，專為人類的配種而研究。

大家為了生產出最優秀的地球人，為了他們浩星各大家贏取榮譽，浩星的人想出很多方法。

例如，打類固醇，是平常事。其後，浩星人發覺雖然男性的地球人在賽跑及打鬥下比女性有優勢，但他們男性的象徵，陽具，卻成為他們的弱點，如打鬥時，被打中陽具的地球人會受重創。有陽具的男人，在賽跑時(當然是裸體，減少風阻及負重)，也會較輸蝕，因為左搖右擺下，不多不少會放礙賽跑者，而跑長途時，被敵方各種影響而令陽具為之勃起的話，更是輸之先兆。

為了贏得比賽，浩星為地球人分為兩種。有配種價值，亦即是有他們賽績支持或本是是"藍血"的話，不會對他們的陽具做些甚麼。但發覺質素一般後，亦即是在一些比賽後發覺不是優質地球人，則會在他們發育完成後進行閹割。

女性的人類被浩星人主要用作配種用途。有配種價值之男性，一年間甚至會為多達二百多女性配種。配種出現難度的話，當然又是用藥。

之後，生出來的地球嬰兒會被即刻帶走，為他們提供最好的營養來培訓。母親與她的嬰兒這輩子也無緣相見。

如果是多胞胎，浩星人會覺得他們在母胎裡的營養被分薄，一生出來就會被捨棄，又或只能做寵物/奴隸。

地球人因此在浩星快速繁殖。浩星開始無能力維繫這些地球人。

跟著，浩星就有一個思想：他們認為，沒有比賽價值的，便應該予以毀滅。為了彰顯浩星的文明，他們會為地球人造出毒針，一打下去(浩星人認為)地球人會沒有痛苦而死去。

跟著，如果地球人在比賽時傷殘，斷手斷腳，又或被閹割掉卻年華老去無力比賽的地球人，都會被"毀滅"。。。。。。而年華老去卻又生存的，每個都要為配種而努力。

不夠五百年，地球人已經變了模樣，變成專為比賽而生。雖然人類仍未是冷血動物，仍有感情，但他們已忘記當日在地球的自由與快活。即使再給他們一個地球，被統治的人類，而失去獨活的能力。

有的，只是在一旁浩星人的歡呼聲，辱罵聲，及身上比割掉陽具後的烙印，與一個個訓練下的鞭印。。。。。。。(完)

遲到與MASS MAIL

心緒不寧下，寫左一堆趕客既野，收視率大跌。。。。呢次認真返d先。

-----------------------------------------------------

睇完杜b兄等一d寫衰老細既事，定下一堆規條，薯仔都想寫下自己辦公室入面既情況。

話說薯仔睇完杜b兄同蓋依米薯既文，薯仔係公司度笑左出黎，亦即刻copy and paste講關於遲到既，出一個formal既email，比薯仔一班經常遲到既同事/朋友，睇下佢地會唔會嚇一跳。

結果佢地無一個理我。

隔左幾分鐘，我好無癮咁問用email再問佢地，"你地唔驚架咩？"

一位同事答我。。。。"如果係咁，你一早比人炒L左啦~!"

薯仔無言。。。。。。。。

----------------------------------------------------------

薯仔都覺得，遲到係唔岩既，要尊重合約精神，合約寫左話你要幾點返，就應該係幾點返。

不過，"合約精神"要唔要遵守，就係要睇究竟"合約精神"究竟存唔存在。

薯仔叫自己做"辦公室閒人"，當然工作量唔高，不過遇著有PROJECT或者突發事件，做都PK亦係閒事。。。。。而薯仔既公司，開OT唔好話有無補水，連返到零晨三點都要無錢搭的士或者食飯!

當然，如果你係開OT，遲一兩粒鐘返工其實都會體諒你。。。。但係，一間公司咁大，咁L多條TEAM，知你做野做到PK既得一兩個人，睇住你遲到既就有百九幾兩友。。。一個唔覺意比D大粒既潤兩句，真係慶L過火屎。。。。。

不過，以上情況甚少存在。薯仔間公司既人覺得合約精神當然重要，不過做唔做到野有時同合約精神無關係。。。只要做得晒D野，有質素既，遲少少返都無人會鬧你，好聽D就叫做有彈性。。。。所以薯仔真係跟足合約所寫既時間盡時到公司只係少數，不過自己識做，咁都唔會遲得太過份，半粒鐘內通常都會見到我既存在。

大家返工，都係想幫老細搵錢，咁我地份糧先有著落麻! 老細同員工，有好多地方利益係一致既，例如薯仔成日都唔願請病假，一黎當然係因為怕左上頭對我印象唔好，二黎都係因為大家既然搭埋同一條船，D野我唔做只會比左我既同事/朋友做，咁樣搞到大家都辛苦又何必呢。

思哲曾經講過，與其自己開OT證明自己勤力上心，點解唔早過老細返，咁樣留個印象會好D？薯仔對此並無異議。。。。。不過，早起身果種痛苦，同遲放工又爭好遠播。。。

--------------------------------------------------------

最後，其實薯仔都有收過好似杜B兄咁既EMAIL，不過唔係講OT請假既野(皆因OT基本上就係無，講黎都多餘)，反而係D好雞毛蒜皮事如著衫要整齊，工作間要企理，快勞唔好四圍擺。。。亦都要提過下返工時間，不過無講到話WARNING LETTER呀咁樣。。。

咁大個人，大家都講自律啦，又真係唔洗擺晒款咁寸，果位同事過火左既，由個MANAGER拍下膊頭勸下佢咪算囉(薯仔當然比人拍過下膊頭)，咁樣既話，做員工既又唔洗咁驚，工作氣氛又和諧D。。。如果唔係，大家搞到公事公辦，然後做細既又按章工作，一預計到要做到OT就推JOB，準時放工，一年半載後佢又辭職或被炒，咁就無謂啦!

所以，呢D DG人既MASS MAIL，薯仔覺得實在唔係管理既上策。。。

被害妄想症

呢種症點樣形成，相信各來賓打呢幾隻字入yahoo或google會知得好清楚。

薯仔想提出我自己既經驗，點樣被呢種症狀既人累得慘。

----------------------------------------------------

家庭上，屋企有兩個老人家，柄埋柄埋無野做，就成日幻想屋企人想對佢地謀財害命，令到本來可以好開心既關係變成比辦公室你防我我防你還要差。

薯仔諗左好耐，點解屋企既老人家會咁諗。

一黎，我覺得係佢地係屋企太悶無野做所以亂咁諗。佢地勞勞碌碌左大半生，以家唔洗做就要諗d野出黎逼自己做同諗，不過佢地諗既野係無productivity之餘亦對其他愛佢地既人做成困擾。

二黎，佢地一路以黎既生長環境，都係處於爾虞我詐之下。慣於處處訪人，以家朋友死既死，嬲大家既嬲大家，無晒錢銀瓜葛下難免諗埋防自己最親近既人。

睇住佢地咁樣，薯仔都好怕，唔知老左既薯仔會唔會變成佢地咁，日日都悶悶不樂，話晒大家都有血緣關係，好難講呢種性格有無遺傳麻!

佢地既存在，令薯仔提醒自己做人要樂觀，要大方，唔好成日覺得人地想害我，咁樣做人會開心好多。。。

---------------------------------------------------------

一位同事，覺得薯仔比pat屎佢踩，係薯仔背後話薯仔無乜責任感。事實上當然唔係，我當呢位同事係朋友，我又點會唔做足我所有既功夫？佢會背後咁講我，我聽果下都好愕然。

以家見到面，薯仔個心都不其然對呢位同事"戚戚然" (表面上薯仔係理應唔知呢位同事話過我，咁我當然都扮唔知，不過成日都聽到佢話中有話，薯仔唔知呢件事前肯定聽唔明)。

曾經，薯仔都有諗過，不如的起心肝同佢撐過(佢既grade都只係大我少少)，大家都說話有骨，我又唔需要買佢怕。。。

但係，都係果句，"怨怨相報何事了"呢。。。或者佢真係覺得薯仔陰9佢，大家都無乜朋友做(事實上我都唔覺佢係公司有乜野朋友)，不過我都無乜所謂喇，唉，又唔係靠佢又唔係痴佢，"十世修行同道船"，大家都唔知會係同一間公司坐到幾時，佢又無呢個能力去做低薯仔。。。

薯仔覺得蝕底少少，都無謂令同吸既人撐到咁行。公道自在人心! 或者之後大家仲會好見面呢。。

不過，對於有能力做低薯仔既，為於自保，就一定要做返少少野。。呢個之後再講。。

改善世界，由你我開始

薯仔係大約幾年前，即係仲係學生既時候，睇睇下一套無線劇集，突然有一個諗法：

無人一出世就想做衰人架，但係點解仲會有咁多衰人既？

----------------------------------------------------------------

我地每一個人係自己心目中都係好人，又或者即使做左大家既norm下，覺得係衰人先會做既野，好多時都會為自己所做既野去開解。

例如，做一個第三者，受害者既親朋戚友當然直斥其非，但係第三者自己會諗呢個只係機緣巧合，命中註定。

篤一個同事背脊，亦可以解讀成自保，而唔理會自己同個同事之前既好朋友關係。。。。但係被篤既，亦都會好慶。。。

人越大個，薯仔係"對與錯"既價值觀已經好模糊。

薯仔曾經有一位朋友被第三者勾引掉她的男朋友。薯仔身邊既朋友對第三者採取敵視態度，而薯仔當時既感覺只係。。。。唉，一個男人咁易變心，比你搶左去都無用啦。。。。結果，無幾耐後佢地都散左。。。

之後，反而有d同情呢位第三者，究竟佢係唔係愛呢個男人愛到傻左，要不惜一切去同佢一齊，犧牲自己既名聲，自己既朋友。。。。咁真摰既愛情，薯仔痛恨唔落。

我深信，當日佢地眉目，sms同icq傳情時，一定唔會覺得自己有乜野錯。錯既，只係時間既錯。。

----------------------------------------------------------

推落去諗，或者薯仔面對既好多人，對薯仔做左一d我唔開心既野，我相信係佢地既角度，一定有佢地既原因。

推薯仔係擋箭，屈薯仔食死貓，離情別戀，不公平對待等等，從人地既角度諗起，好多時都會明白佢地咁做自然有佢地既理由。

或者，佢地無顧及過薯仔既感受，但係薯仔即係薯仔，我係好多人心目中，只係一個可有可無既人，又點可以怪佢地？即係非州夠有好多人需要幫，但係點解我地又唔盡力去幫？

即使係狼女呢種人，係要卸隻鑊落黎比我食，我亦都明白，佢果陣，佢唔係想我去死，呢個只係佢一貫既做事手法，可能亦都無諗過咁樣卸落黎會對我做成好大困擾，亦無諗過我真係爭d辭職唔撈，亦無諗過之後同薯仔既格劍令薯仔覺得心灰意冷。。。只係之前一直行之有效，可以"get the job done"之餘自己亦無賴野，所以先一路唔用腦咁做落去。。。

其實咁做野，狼女又點可以再進一步？或者當佢明白呢樣野時，就會在明白做人處世既道理。。

對種種是與非，薯仔採取更多更大既寬容態度。。。。自保措施當然要做足，但係亦都唔需要攻擊他人，老土d講句，"怨怨相報何時了"呢。。

遇到不如意事和人，唔好轉牛角尖，低聲喝采嗌一聲"yes!"，然後慢慢一步一步做。。。人生在世數十載，一時間既野係之後望落去都係微不足道。。又何必咁執著。。

將呢種想法，推己及人，令大家減少戾氣，明白大家一齊都總算有緣，做事前多從其他人角度出發，自己不如意時諗起其他人亦唔係有心想咁做。。。。慢慢，大家就可能會有薯仔既感覺。。。。係薯仔身邊既朋友，好多好多都係無機心既朋友，大家仲保持到純真既友誼，而即使唔係薯仔朋友既人，亦都覺得薯仔無機心而友善地對待薯仔。。。

點解要讀書？(2)

kenka兄同杜b兄既留言，令薯仔再想講多少少。

關於香港教育既是與非，薯仔相信薯仔點寫都好，都幾難詳盡得過咁多年黎既辨論。薯仔只記下自己既感覺，希望眾blogger同光臨寒舍既朋友，可以分享一下。

---------------------------------------------------------------

kenka兄：

其實係無錯。無論係中化歷史，只要唔係純科學(即係一加一等於二，世界通行唔會錯既知識)，香港既教育係唔會鼓勵學生去做唔同既思考。

例如：儒家獨大，咁莊子老子墨家等既學說係唔係唔得？點解我地一定要奉儒家為正統？君君，臣臣，其實係唔係令我地積弱既原因？

當中點解會係咁，一言難盡。薯仔即時諗到既係，一黎香港比分講求客觀，答案唔跟model answer黎比分實比人嘈，尤其中學公開試可謂影響考生既一生。二黎，當局同香港教師無此等能力去為"客觀答案"評分。三黎，以家仲有埋政治考慮呢。

試想像，如果薯仔有一日答問題，題目係香港經濟如何起飛，但係薯仔寫既除左自由貿易英國有效統治等等外，仲寫埋d有賴日軍統治時期香港人捱慣苦，共產黨統治中國令香港人無路可逃而專心一致係香港搵錢，仲有中國人本身既奴性令香港人完全服從英國政府，究竟老師應該點比分好？

係唔係捱過比敵軍統治既地方人民會比較努力搵錢？共產黨係唔係真係會令人怕到離鄉別井專心係香港打拼？仲有，中國人既奴性!？我比分你教統局會唔會黎勸籲我架？？

面對呢種種主觀既答案，即使薯仔係老師，我都要好好咁睇下歷史書先咁為呢位學生既答案評分，而老師，因為本身工作量已多，改一本簿仲要睇咁多參考，緊係睬你都傻，最後通常都係叫你睇教科書算數。

薯仔比較好彩，本身較為有書緣，上堂時遊刃有餘，可以自己發下白日夢做一d逆思考，而老師們對薯仔亦算容忍(除了有些老師因為薯仔太過遊魂而有"恨鐵不成鋼"的感覺外)。。。所以亦算係比較有獨立思考既學生。。。。。

所以薯仔對讀書其實唔反感，課室內除左令薯仔吸收知識，亦可以培育到薯仔既思路，對唔同問題可以有唔同既approach同睇法。。。。。。

------------------------------------------------------------------

杜b兄

你提出既問題，薯仔其實都有見過，尤其前幾年沙士時，03既大學畢業生，出黎搵工果種愁雲慘霧，實在令人難以相信呢班搵緊工既人係大學生。

我見既朋友們，03年出黎既，唔好話人工近乎羞辱性(六千蚊左右，以家請個clerk都唔只啦!)，比中五grad出黎做野既人工低一半唔只仲要比佢地笑既亦大有人在。

不過，即使係薯仔會考14分/高考無科cred/最後city或ust既pure science收我，我依然係會揀大學。

ive或者重讀等，經過呢幾年既經驗後，薯仔更加係唔會考慮。

第一樣野，薯仔唔鐘意將讀書同搵錢劃上等號(不過，讀書勁更係有著數，求學不是求分數，講笑呀？)，讀書本身係一個investment外，將心情調節好亦係一個享受。咁早出左黎做野，呢世仔之後都好難可以全職讀書。

第二，中六七同大學時期識既朋友，好可能就係薯仔呢生人識既最重要既朋友。大家會一齊玩活動，為左好無聊既事或者榮譽大家係到爭，嘻嘻哈哈又一日。中六七點樣帶領一班小師弟妹去玩同搞學會，同埋同一班同學一齊為高考拼命，大學時大家一齊走堂，兩三點時一齊食tea講閒話，再唔係出埋去睇場兩點半，或者為左自己個系出一分力，你踩下我我踩下你，種種都唔係中五出黎做野之後可以有既開心時間同回憶。

以家薯仔依然會同一d大學同學一齊敘下舊，毫無保留咁分享大家職場逸事，亦唔係中五畢業後際遇各異既朋友可以理解。(起碼薯仔認識既中五朋友中，無幾多個以家係中環返工。。。。)

淨係為左讀多五年書，玩多五年，都已經係努力讀書既重要原因!

而，杜b兄，無可否認，以家已經唔同左，大學生唔係前途保證，一張cert或者只可以令你搵到一份office工。身為大學生，以家亦要面對一個較低學歷人士既問題 ----> 高層唔退，係無咁多個位比我呢d大學生去升。大家好可能最後都係變左一個上下不討好既middle management。

不過，世事日日新，吸收多五年知識，同一個中五畢業出黎既比，大學生爭既，可能只係五年office politic經驗，而呢樣我地有三四十年去領會 (睇下ak兄，已經洞悉世情，我諗真係有一科講office，ak兄已經係研究院級別)，而中五學歷人士之後只能以part time形式進修，會辛苦好多。。。。而升唔升一個人，我相信學歷亦都係其中一個關鍵。

--------------------------------------------------
到最後，薯仔補充一樣野。薯仔之前提過，03畢業，搵$6000蚊個月左右既朋友，已經轉去一份叫做有前途既工。至於03年時可以恥笑大學生既有經驗人士，佢地家下既轉工能力。。。。。

職業無分貴賤，人格方有高低。你唔係同我借錢我又唔使靠你，朋友做乜野工薯仔絕無鄙視之意。如有中五grad之朋友經過此blog而覺得被冒犯，薯仔在此深表歉意。

總括而言，薯仔覺得因為怕搵錢唔夠多(有實際需要如家庭財政能力不足以令你讀上大學)，而投身社會大學，係唔可取亦頗為不智。。 。。。。。

點解要讀書？

薯仔之前寫過一篇拙文，略略寫過點解香港地以家要學足兩文三語。

薯仔睇完杜b兄講關於professional唔值錢既blog，再加上另一d forum又有學生問起我地點解要咁勤力讀書，我又想講兩句。

------------------------------------------------------

薯仔身處中環，一個人地睇落去好似係齊集香港精英既地方。

做緊既大公司，當然除左洗杯嬸嬸，送信叔叔同搬file哥哥外，即使做sec既我諗都可能有張大學cert。

讀得書多真係唔代表你會發達，但係如果用一個大既sample size，讀書讀得多同搵錢多唔多，實會係positive correlated。。。。不過，有d讀到三五七個doctor還未收手既當然另當別論，皆因搵唔搵錢佢地已經無乜所謂。

搵錢搵得多就代表做人一定開心，所以就要讀書讀得多？無錯，其實係唔一定架喎，不過香港地，你搵得錢多，人地覺得你係成功而產生虛榮感外，自己係會有安全感好多。

有錢唔代表你會去用盡，唔代表出入會搭的士，件件都係armani，但係有錢即係代表你有呢個能力去做，感覺會開心好多。

一個例子。薯仔有一個朋友，因為屋企人生左一個腫瘤，應該都係良性，所以公立醫院排年幾先幫佢做手術。朋友既屋企人當然唔安樂，話晒有個瘤，點知會唔會到最後係惡性？

如果無錢，就當然要等，個心十五十六多年幾。。。有錢，羅三五七萬入私家醫院，兩個禮拜內搞掂。。。

---------------------------------------------------------------------

有少少離題。其實讀唔讀書，除左錢外，亦代表一個人既成功感。

ck兄提過，當佢一籌莫展唔知點樣做一個更成功既打工仔時，亦試過去讀一個mba。

讀書讀得叻，結果做野時食蕉大有人在，但係讀書讀得唔叻，有無人比機會你去表現自己亦都係難講，甚至乎可能要捱多一陣先有機會去表現自己。

咁點解一開始讀書時唔證明比人睇你係得既？

--------------------------------------------------------------------

再講多少少。讀書除左一張成績表，由一間學校比一個證明比街外人睇你既才智外，亦都係滿足自己既一個過程。

phy chem bio可能真係之後用唔著，不過經過phy chem bio既鍛鍊，一個人既邏輯性同對世界萬物既了解係會深左。中西史真係唔會有人做野時講起，但係讀完後對世界時勢既了解會深左，對新聞既解讀能力亦會強左，亦可以細味欣賞現有世界既發展。

試諗下，唔比心機讀書，點可以體會到一個架仔拜唔拜靖國神社會搞到咁大件事，勾起國仇家恨？唔讀phy chem bio，又點會深切感受到全球氣溫上升對人類既影響？

最重要係，唔係讀書時學到點樣睇呢個世界，培養自己既價值觀，薯仔都唔會係呢到開blog。。。

--------------------------------------------------------------------

補充一句，一個十幾歲既人仔，除左讀書外係無乜方法可以裝備自己迎接挑戰。係，無錯，係有一d年輕既創業家好成功(尤其之前有個0靚仔搞左檔生意幫香港學生留學中國，呢個idea真係掂!想當年邊有人會咁諗？)，其餘既，有好多，好多都係捱世界。

薯仔之前行街，先留意到原來有好多sales年紀係細過薯仔(又一年老既證明)。

唔係做sales唔好，薯仔唔鐘意用職業去界定一個人(反之，薯仔仲好想識多d做sales既朋友仔，買野有折麻!)，但係做sales除左較坐寫字樓辛苦外，前途等亦係無咁明朗。

既然如其之後出去捱，點解以家唔開始慢慢讀下書呢。。。。

唉，起碼返寫字樓，見到紅日時都有幾日假放下，同fd去街玩都易d丫。。。

辦公室閒人

"想，我都好想好似中左頭獎，有野唔洗做，老細又吹我唔脹。日日等出糧，無乜野需要緊張，就係咁既樣無都唔洗撈就至理想。"

各朋友記得數年前，LMF紅時，曾有這首"大懶堂"嗎？薯仔聽過這首歌後才知道，原來中頭獎的感覺，就是返工無野做，日日等出糧。

但是"日日等出糧"真係咁正？？？"辦公室閒人"這個blog名，就是從此而來。

-------------------------------------------------------------------

一個中環甲級寫字樓的小薯仔，在一個無job纏身的日子裡，又可以怎樣過？

每朝早回到公司，施施然吃早餐是必然的事。那朝早有種詭異的氣氛如"眾人皆忙我獨閒"的時候，薯仔是不敢在早餐外額外加上blog 及報紙等娛樂，頂多是用"快勞"送早餐，邊"工作"邊吃。

吃罷早餐，是時候想想薯仔的一天應該怎麼過(番鬼佬所謂的planning)。打開電腦，回憶自己跟開的job，細心看看in-tray有否待辦的文件等等。。。

當然，如果真的有job在手，上一個步驟是廢的，有job是必然會記得，不會掘files時找出一些未完成的工作。

如果真的左思右想也沒有工作，就要視乎薯仔的心情。

心情好時，會主動向一堆高薯仔4 5 6個grade的師子老虎問問有甚麼可以幫手。

不好時，薯仔會懶得去理，在網上看一會兒報紙或者做一些research如股票呀等等。

當然，即使是薯仔開到聲，他們手頭上的工作(如果有的話)也未必能下放予薯仔，皆因高得我4 5 6個grade，他們做到的我未必能。

亦即是，很可能到最後薯仔還是看報紙打電郵閒聊等讓時間過得易點。。

通常，一整天就會這樣過。。。。

-----------------------------------------------------------------------------

是不是很"梳乎"？

當然不是!!!

當你沒有工作，其他和你同級的同事在忙時，如薯仔等低級職員會很怕，皆因不知究竟是薯仔好彩或薯仔已被打入冷宮。

即使是全部同grade的人也在發霉中，薯仔等也要小心翼翼，因為上頭見到我們無所事事又有可能無名火起。

主動去幫獅子老虎，他們拒絕得你一兩次又要想甚麼是時候再問，否則忘記了他們會以為你有事在忙，但看見你仍在閱報又會SG你。問得太密他們發火又會SG你。

當然有空閒時間，其實公司一定有事幹，執FILE也可以執個不亦樂乎，但沉悶至此，真的坐在一個有舒適空調座位下很易睡著。看得多公事外的網頁(如眾BLOGGER等)又怕被人閒話。

結果，如果真的無啦啦又有JOB去做(即使是影印也好)，百無聊賴數小時後，通常已經沒有MOOD去再做，結果又要調整心情。。。一個難捱的過程。。。。

結果，薯仔在一個沒事幹的工作日，通常是又怕又沉悶又膽戰心驚。。。。

---------------------------------------

人生不嬲都係"我睇你好，你睇我好"。薯仔以家做緊好多人既DREAM JOB，但係實際上，真係咁"DREAM"嗎？

愛一個人

讀罷ck和渣老闆關於男人忍唔忍得住唔偷食的文，有d野又想講下。

薯仔估，其實唔只男人，女人亦都可能有偷食既念頭，但係奈何先天性條件加傳同觀念唔同，男人偷食真係易過女人，咁亦相對上，感覺上，男人偷食多過女人。

以薯仔黎講，引誘唔係無過，係一個人無人既家中，爭d就做錯事(唔同既，果次唔係薯仔懸崖勒馬，只係人地拒絕，哈哈，勁樣衰)。

不過，有伴侶時就話偷食，無時就會話one night stand，前者令人聯想起賤男，後者令人聯想起"蘭桂坊，夜夜笙歌"。

正當薯仔以為自己係個賤男時。。。。

過左一排，薯仔既ex主動搵返薯仔有d暗示時，薯仔有點點心癢。。。。開始幻想偷食既過程。。。

但係心癢唔夠一陣，再諗深一層，如果我真係咁做，我對得住以家既另一半嗎？

核突d咁諗，唔好計傳統觀念，係我全心全意對一個人時，我實在係容忍唔到將我既性器官在另一個人身上用到，即使可能薯仔既另一半唔覺，我自己都會覺得好對唔住佢，會覺得我令到佢污糟左。。。

薯仔去到呢一刻，先明白，愛一個人係有種咁傻既感覺，會自我製造束縛。。。唔怪之得細個拍拖會比人話係puppy love。。。

恭喜發財~!

睇見眾bloggers大家都喜氣洋洋，互相恭賀，薯仔亦在此恭祝各光臨小blog既朋友，心想事成，笑口常開!
-----------------------------------------

新年流流，唔好講唔開心既人同事，就講下新年既薯仔係點過啦!

薯仔一朝早就起身食糕同食粥，然後年年如是，坐係屋企等下人黎拜年。

今年無乜人黎，印象較深既係一個鄉下落黎香港，年年都會黎坐下既親戚。

嫁人後落黎香港已經三年左右，個仔都兩歲幾。

還記得當日都仲係好鄉土氣下，以家已經似一個出沒新市鎮既師奶(唔同地區既師奶亦有所不同，出沒銅鑼灣既點都比出入天水圍既唔同)，湊住一個兩歲幾既仔，一副媽咪格。

大人(做得家長既)就係廳出面傾計，薯仔就捉左佢個仔入房玩。

薯仔鐘意小朋友，人所皆知，行街搭車飲茶，見到bb都會扮個鬼臉同佢地玩下。

之但係。。呢個實在勁百厭。

著住對鞋係梳化上踩黎踩去，到左佢阿媽幫佢除襪時，佢就赤腳係間屋到周圍走。佢鼠入薯仔間房，見到電腦就發癲(兩歲幾就已經明白乜野叫電腦。。。)，係咁係個keyboard同老鼠上係咁拍係咁拍。。

薯仔由得佢，望住佢唔係拍到format左部機就算。。

拍到厭，就竟然落凳，拍我部住機。。見制就按，當然係按埋我部電腦個開關制。。

叫極佢唔好按。。但係薯仔一唔留神佢就即刻按。。部機當然熄左，我就嚇佢話壞左。 。扮嬲，然後同佢講，我叫你阿媽入黎打你。。。

佢個樣有d驚，捉住薯仔隻手。。(註：兩歲幾，仲未識講好多野)，示意薯仔唔好出去。

好得意好得意。。。。。。

然後佢又好叻仔咁開多次部機，懶叻咁既樣。。

不過薯仔呢次真係驚佢會整壞，唔比佢再亂咁拍。。佢就唔制，扭計，係咁推開薯仔隻手。。

我怕左佢，抱佢上床，開電視，比個手制佢，等佢望下薯仔原本玩緊既winning eleven。。

點知佢羅個手制，放係個頭到扮超人，自己係到笑。。。。。吹脹。。 。。

見到床隔壁係窗，即刻成個飛撲個去，"車，車，車。。"係咁嗌。。

佢開個窗，薯仔從後抱實，等佢伸個頭出去睇。。。

睇唔夠一陣就厭，'卜卜卜'咁自己落床，又跑又跳咁出去，薯仔當然怕左佢，即刻跟出去。。。。

佢赤腳想跑入污糟既廚房，薯仔怕左佢，係佢踏入去前，一手抱起佢。。。。

佢好開心咁拆左黐上雪櫃上既磁石，然後就扭計要出返去。。

怕晒佢，我dum佢返佢阿媽身邊。。。

佢自己跟住又擺d磁石入口，又亂咁掉。。。

我搶返d磁石，佢又係咁嗌。。。

------------------------------------------------------------------------

搞搞下，薯仔已經筋疲力盡。。。。。有諗過兜巴昇暈佢。。但係見到佢自己係到笑又唔捨得唔陪佢玩。。。。

細路，都係玩下好。。自己生要諗過先。。。

--------------------------------------------------------------------------

點都好，新年就應該係咁，開開心心又一日~!

祝多次，希望大家會開開心心渡過每一日!

男孩的需要

前言：數日前，與一眾不太相熟，朋友搭朋友的妹妹仔(大約21-22歲喇)一起唱k。其間，當薯仔和朋友一起玩房內的winning eleven而對唱k不太熱衷時，聽到妹妹仔在薯仔背後竊竊私語道。。。

"都唔知d男仔做乜，一隻game又係屋企煲仲話練以家出到黎唱k仲要不停咁玩。。。"

所以，今日薯仔想以此為題目，抒發一下。

-----------------------------------------------------------------------

正文

薯仔經常被人認為是長不大的男孩，經理會勸我工作時應該看似"專業"點，朋輩會勸我說話時要小心點，同事們會勸我在辦公室內提防點，皆因沒有永遠的敵人，而當薯仔有另一半時，另一半也經常裝生氣，鬧我"粗心大意"。。。

薯仔長不大，一部份原因可能潛意識薯仔不太想長大，尤其面對辦公室裡的獅子老虎大笨象，薯仔覺得有點像無線的劇集，害怕去面對，變成其中一份子。。。(而薯仔看似長不大的性格，卻也換來辦公室內一老虎的關照，所以雖然狼影處處，薯仔也安然無恙，但此乃後話)

現階段來說，薯仔可謂無欲無求。薯仔身處一中環甲級寫字樓的外資公司(雖然薯仔一再強調中環無特別，但很多叔父輩不是這樣想)，大致沒有ck兄所談的港男被傳統觀念"唔搏唔得"的束縛(其實薯仔也很想在這題目上另文一篇，奈何近日實在忙，回家已不想再開電腦)。

工作前景因有老虎(在此名為linda吧)的關照，尚算秀麗及明朗，加上現時的中環經濟好景，薯仔在工作層面上不用太憂心。或者可以考多一點資格，或再進修，但成功與否對仕途的影響已經不再是決定性的事。人工與年資掛勾(只少暫時還是)，多或少已經是考慮之外，反正以薯仔這個年紀的人算是滿意就可以了。。。。

曾經聽過，男人只有兩種煩惱，一是錢，一是女人。

或許有點自負(可能惹來一點鄙視)，薯仔從來未層擔心過女人這問題。先不說薯仔之前也未曾試過"追"，看看薯仔身處的中環甲級寫字樓的外資公司，從來只有情人節無花收默默ot的女強人，卻無情人節愁眉苦臉孤家寡人的男中/高層。所以麻，怕甚麼？

女人和錢都不是問題，所剩餘的就是自尋煩惱的問題。

例如不夠錢用(每考一個qualification都要幾千幾千)，家庭經濟狀況，薯仔公司內的鬥獸棋式的人事關係(薯仔肯認衰，下下笑面迎人，同一眾狼等打好關係，其實應該可以一帆風順)等等。。。

所以如我等男孩，又有甚麼想要的？

身為"閒人"，薯仔並不會在空閒時拿與工作有關的書籍細味，也不會與高層扮有心的討論工作。。。工作那麼沉悶，又有甚麼好討論!

工作閒時看看報紙，或者從眾BLOG裡找出合口味的定期追看，與些同事廢話連篇(多數是男的，女的反而比較有事業心，正經，與薯仔不談得來)，等到放工時回家吃飯，有時和薯媽薯爸一起去館子，分享一下他們未能體會的中環生活和我未能體會的街坊生活，然後回家，玩一會兒WINNING ELEVEN或者三國志等遊戲，讓我忘記工作上的壓力，就是時候就寢。。。。

所以麻，女孩們，不要將薯仔看作怪獸般，女人們在一起可以談化妝品，男人在一起，唔想吐苦事，一起在電視機前為WINNING ELEVEN尖叫也是很開心的，甚至比和一堆女孩唱K更加開心。。。

MT = ?

大約在數年前吧，應該是銀行或是某些大機構，創造一個新職位，專為吸引一些高材生，為他們設計一條清析的career path，目的是令他們在三五七年後，好為這些大機構補給人才。

這個職位，名"MT"，全名management trainee。

固名思義，當這職位的人，是"管理"的"訓練生"。

而這職位，亦令一眾商學生，亦即是最終想當管理層的大學生，趨之若鶩。

國際性的機構如P&G，JOHNSON & JOHNSON等等都有係香港招生，匯豐等金融機構每年亦會聘請十數或更多的人。

因為MT在這些機構實在成功，除了一眾天真的大學生羨慕被冠上MT頭銜的師兄姊外，一眾商家，有心或無意，亦都開創以MT來引大學生上釣。

不過MT是一個精心設計的計劃，並不是阿水都明白當中概念及令公司的人滿意。這些有意發展MT的公司很多都失敗收場。他們令人婉惜，但一些無良的卻是令人痛恨。

在此，薯仔列出一些例子，希望各將畢業的同學仔，或各HR或老闆，明白甚麼叫做MT。

- 香港差不多每間銀行都有MT，我就以恒生做例子。恒生MT是要每一段時間就要轉部門，在三五年後，滿意的話就會轉做MANAGER。

轉做MANAGER當然美滿，但當中：-

。前三年，薯仔記得好像是合約制

。未必每個CANDIDATE都能成功三年後仍能留在恒生

。留得在恒生，做的仍可能是ASSISTANT MANAGER。請記住，一個大學畢業生，三年時間在很多地方亦能升到上ASSISTANT MANAGER。

。所屬部門亦未有得揀，甚有可能被派往前先搏殺(即我們稱之為CUSTOMER SERVICE，或SALES)。正常一個大學畢業生，一入行願意做CSO("CUSTOMER SERVICE OFFICER")，做年半或兩年，TITLE升至ASSISTANT MANAGER亦非難事，做夠QUOTA就可以。

那麼，想清楚，銀行MT那麼好嗎？

- 大機構MT

我並不記得曼寧是不是怡和所有，但我還在大學時，去曼寧做MT也是一件很"威"的事，成績及課外活動差點也不可以。

RECRUITMENT提及，當MT可以快人一步進身管理層，但其實都是要捱一段在舖內做SALES的日子。搬貨收銀當然唔少得。

唔係話搬貨收銀唔好，但是想清楚，又係做三五年先知自己做唔做到高層的公司，中間過程又說不上快活，為甚麼要一窩蜂申請？

當然，我尚未提及明眼人一看就知搵笨實的麥當當MT。。。

------------------------------------------------------------------

薯仔不是說MT無好野，有很多很多MT都是前途光明的，不過，香港萬多個大學畢業生，這些好MT的空缺，又有幾多？

相反，用MT去招搖撞騙，卻又不少。

朋友M在一香港知名大機構，香港某行業的龍頭工作，職銜又是乜乜TRAINEE，甚至乎比萬寧等的CAREER PATH更為清楚。

朋友M當然開心，但之後。。。。。

1。頭半年，所謂TRAINING PERIOD，就不停轉DEPARTMENT，每個地方坐兩個月就走。兩個月就走，莫說學到甚麼運作，其他職員看到你還嫌"阻定"

2。發覺，最終派去的地方，和他的學歷完全無關係，亦即是一個中五生都可以HANDLE的工作，亦不見得前景有何光明之處。

朋友M後來發覺，此大機構，原來甚麼連MT都未懂，以MT請人，只因為機構內缺乏大學生，以此等大機構來說完全不成正比!。。。

朋友M捱不了多久就辭職，又一浪費大學生時間又浪費機構資源之例。

另一朋友L，在另一更大機構做甚麼TRAINEE。。。擊敗過千競爭對手，被選中後極之高興。。。。但之後才發覺：-

1。公司論資排輩極之嚴重，一眾老屎忽小你就小你

2。公司睇住你比人小就有得你，因為。。。。

3。佢地都唔明你想點，亦都。。。

4。唔知自己請一班大學生又可以點!

頭數個月，除了體力勞動外，就是體力勞動。。。。。

另一朋友C，在一蚊型公司做MT。。。然而，所謂MT就是做老闆跟班，名為MT實則秘書，更甚者，因為朋友C是公司內極小數大學生，要協助老闆做一些高層次如做"數"等。。。。

市面上還有很多MT，但請各大學生，唔好一望見有"MT"兩個字就撲過去，望清楚啦。。因為當中，好可能係純做SALES(MARKETING TRAINEE)，甚至執頭執尾(MISCELLANEOUS TRAINEE)，又或者係爆屎渠都要做埋(MAINTAINENCE TRAINEE)。。。

PS喳老闆及一眾其他老細，又有無諗過用MT去請人？

Rudy Giuliani - Leadership

唔知各位黎呢度既朋友有無睇過呢本書。

想當年911後，朱生乘勢推出呢本書，以本身經驗道出點樣管理好紐約市，同埋點樣帶領紐約從911恢復。

薯仔當年無野做，見本書係書局好似幾賣得，咁就買左一本返黎睇。

總括而言，書入面既野，實在係非常之--------悶。

入面既內容，我已經無乜印象。反而佢講左個佢做leader既原則，就令薯仔時刻緊記(其實以下所講既，之前都有人以清單形式提過話朱生管理法則之類。。 )。。。。就係：-

下屬出事，第一件事係要企黎保護個下屬，然後先再查。

所謂危機管理，即係要個下屬即刻出黎擋箭，係下下之策。(但係好似董建華咁係又保唔係又保，亦都係唔要得，會令團隊既質素水平下降)

果陣時睇，無乜感受。以家就真係感觸良多。

每一個出黎做野既人總有機會比人嘈，又或者發生問題既時候被問責。

試過一次，一中層人士，狼女，要薯仔幫佢做一d admin野。薯仔不慎有詐，照做無誤。

做完後，原來中層人士既方法係錯既，賴左野，但係佢竟然夠膽死將所有野靜靜雞都推落黎我果度。

吹L脹。最L大鑊係，到appraisal時先知道比人插一刀，果陣高層仲好好語氣咁同我講，"薯仔，唔緊要架，你經驗少，做錯都應該架。。。"講到咁樣，我仲可以講咩？

試問，咁樣既環境下，士氣又點會高？所謂teamwork，除左槍口對外時，一定要有個盾牌係中間頂住。。。我諗ak兄對於"teamwork"既體會必定比小弟高幾倍。。。

要保住下屬，令到佢明白個上司係有心想為佢好，咁個下屬先有心機，谷出所謂既士氣去同你劈架麻!

亦令薯仔諗起，往日公司忙時，公司都有請幾個intern黎幫手。其中有一個同薯仔好熟，薯仔亦根據朱生所教既，係可能既情況下，唔會推佢出黎受靶而盡力自己頂(話晒我高級過佢，我點都有呢個責任)，叫佢放心去做。

"定d黎"係薯仔當年成日同果位intern妹妹講既野。

到最後，大家交換埋msn等之後，佢走時，竟然話薯仔似一個補習既"哥哥"。。。。。。。。

真係有幾多汗都滴晒出黎。。。

兔子和狼 - 從兔子的角度

工作上比較得閒，詳細讀左各blogger既entries。當中，cm兄提及既兔子和狼既故事令小弟有d感觸。

網上曾細讀過既blog如ck，渣沽，思哲同cm等等，都係從一個老細或高層，又或從一個局外既角度去分享點樣將呢兩種動物一齊相處。。。尤其如ck同渣沽等既老細分享，薯仔真係獲益不淺。

薯仔身處既外資公司，有個特徵同個故事好似。

就係如薯仔咁既兔子係有好多。我地繁殖得好快(皆因年年都請好多人，甚至係excessive咁請人，請定黎預有人走時唔會哩咁heir)，亦因為人多兼人微言薄，好多升上中層既人已經可以對薯仔等人操生殺大權，任意指使。好人既會顧及你感受，唔好既就。。。。。。。

在狼(懶理兔子生死既中層或高層)既撲殺下，兔子死既死(離職)，傷既傷(被雪入冷宮)。到左兔子小到某一個地步，超高層就會問，"點解咁多兔子唔見晒？"

因為有呢個機制，故事就不斷重現：

狼殺兔-->兔少-->狼被訓話下轉至溫馴-->兔多-->狼轉趨暴戾。。 。

如薯仔等既大學生，可以舒舒服服坐係中環甲級寫字樓，加上中環環境下自覺有才能，所以係唔太鬧得，莫講如話渣沽兄等用粗口鬧，吋吋地潤兩句都會比如薯仔既人駁返轉頭。以家，亦都可以算係cm兄所述既兔子多到夠膽住係狼既隔離。

不過，市道，尤其薯仔處身既行業，實在係好，係狼撲殺之前，兔子一鬧或者一唔開心，甚至只係感覺到有殺意，兔子已經自動由一個樹林去另一個樹林。所以以家既兔子唔會死(被人炒)，只會自己移民。。。。

市道唔會永遠地好，生態系統終會歸於平衡，但係在那之前，各hr高手或老細會點樣處理兔子和狼既人事關係？

--------------------------------------------------------------------

除左以上薯仔胡思亂想下，諗埋好多兔子和狼同薯仔既關係外，亦都令薯仔諗起，究竟一隻兔子，係人類要保持樹林既生態平衡下，應該要點做。

以cm兄同其他blog友所述，高層係唔應該介入狼同兔子既生活。

係呢個情況下，如薯仔既兔子為左安全咁留係原有樹林，一係就搞關係搵人類保護做寵物(搵高層照)，一係就忍氣吞聲，見到狼就走，提心吊膽。

後者唔符合薯仔既性格，前者如各老細及hr高手咁講既話亦係唔得(更甚者會被同類鄙視外亦惹黎人類抽後算帳!)。

兔子就是兔子，生存要靠繁衍力既註定受生物界看輕。以後有時間再詳述一下兔子如我以家既生存之道。

做生意？

睇下其他名blog如ck同渣沽既blog，實在學到好多從我呢等小職員所未諗過既野，亦都識得睇更多既職場人情世故。無左以上兩位既blog，薯仔以家仲係唔係中環甲級寫字樓小職員都未可知。

有一篇，ck提到既係香港人既創業精神，薯仔亦深表認同。ck提到既香港人創業失敗就好大鑊，薯仔係到就寫返少少感概。

薯仔由細細個開始就無諗過做生意，可能薯仔欠缺教科書所講既"企業家精神"。

到大個左，發覺自己(應該係大部份香港人都有既諗法)唔係太適應打工仔既生活，亦有諗過做返一d無咁"辦公室"既工，例如教下書呀做下研究之類，又或者想試下做一個freelancer。(做生意又無諗過，最大原因都係無本)

但係諗落，以家薯仔住既地方叫香港，係一個競爭異常激烈既地方。

讀書要爭，爭到入大學，以家出左黎做野競爭都未完結。係一d大公司，小兩年經驗，人工都可能爭一大截。。。一份工比得咁多錢你，就緊係要你做返咁多野。。況且初畢業呢幾年對薯仔好重要，因為薯仔仲算係初畢業，即使做錯，其他人仲會原諒，亦都會比機會你去試。

諗通左，決定投身中環，但係做左一排都係覺得唔對路。唔係以家間公司career path有問題，而係。。。中環工，又或者可能只係以家呢份工既問題，令我覺得，一舊薯仔應該返去薯仔既世界，而中環，係一個弱肉強食既地方。

自己出黎搏一搏既諗法又浮返出黎，亦都試探地問過幾位朋友既意向。

但係再諗深一層，我一衰左，唔好話自己既錢唔見晒，屋企人都可能會受到牽連，即使係以家唔算好(當然都唔算差啦)既生活質素都會不保。。 。。自己可以再搏，但係前提係薯仔愛既人(包括家人)唔可以受影響。

生命，從來唔係自己一個人既事。

要等，亦都要忍。

大學畢業生既洗費

薯仔未讀大學時已經接觸過乜野叫做複利，點樣細細個，每月擺二三千落去零存整富等既計劃，過唔知幾多年就有幾多回報。

講就易。

當你係一個大學畢業生，搵到萬二左右，算唔錯啦。如果屋企唔洗靠你，甚至乎唔洗比家用，如果好彩你阿媽比埋首期，你去供一層舊樓都夠。

但係點會個個屋企都咁好彩。

要保持以家既生活質素，又或者其實去想比屋企人一d好既生活，每樣野都係要錢。裝個有線要兩舊，寬頻舊幾，手提電話一家三口都加埋四舊，唔好計水電媒管理費果堆，如果夏天要開埋冷氣，諗起張電費單就真係凍到入心。

仲有，每個月定期既家用呢？

淨係家庭既必需開支，好彩既四千可以了結，咁當然果個月就最好唔好請屋企人食飯，亦唔好有其中一個人生日。。。

咁跟住又要到自己洗。返得中環工，裝身等當然唔小得。唔係armani都唔好去旺角做一套四百既西裝啦。淨係食lunch都要千幾蚊一個月，如果要開埋ot，夜晚果餐即使去大檸樂食，以家大檸樂都要收三十幾一個dinner。來回車費，好彩住係港島唔過開就話十鬆d蚊一個來回，唔好彩既話就廿幾。。。仲要返得大公司，要陪一班搵得咁上下既人癲，食雪糕當然唔會係牛奶公司，一班人去食飯亦都唔會去老麥。。。放工後既消遣，一個happy hour都要成舊水啦，唱k食飯就仲貴。

如果d衫褲唔穿唔爛，一個月淨係返工都要預二千五至三千。

咁搵萬二，一個月淨返五千幾。

呢五千幾，就要預黎有時買下衫(香港地買衫幾x貴)，對皮鞋著得爛爛地買果對都要五六舊閒閒地(幾十蚊對既，著成日真係隻腳想生乜就有乜)，有時有d突發節日如生日等，朋友既夾兩三舊，屋企人出得去食飯當然唔只呢個數，亦要希望無乜突如期來既請帖。

淨返既數已經唔多，當四千好未？但係一個如薯仔咁上進既大學生，如果投身於中環工，唔會覺得一個degree係夠用既，咁就要報多d qualification。做銀行既cfp，insurance broker等等考極都考唔晒，唔做銀行做其他金融related既cfa亦都係玩到嘔泡。一個試幾千，報埋course既話考一次試過萬亦唔出奇。

講左咁耐，都未講，如薯仔係有薯女，咁又點算呢？

返得中環工，仲要係大公司，唔知內情既實以為你好掂，食飯行街睇戲等支出當然係你比，仲要因為你返既係中環工，你既另一半唔會預期你帶佢食老麥。一個禮拜出黎玩一次哩？都閒閒地唔夠四五舊，一個月又千幾。。。咁當然又係唔好計果d乜乜節日紀念日既特備節目禮物等等等等。。。

呢萬二蚊，數到呢個地步，已經所餘無幾。

----------------------------------------------------------------

所以，如果你曾經cold call過一個後生仔又比佢cut過線，呢個可能就係薯仔。唔好怪我，我一諗起以上既野，又點會對financial planning有興趣。。 。。。

唔識普通話，搵到好工你都無用

多謝c.m成為第一個留言者。

話說薯仔以家既一間中環公司，係由鬼佬做老細，咁自然之前既筆試面試所考既只係英文。

入職要求裡，亦並無要求應徵者去認識普通話(呢個亦係薯仔點解眾裡尋他，要揀以家現有呢份工既原因)

薯仔既學生生涯裡面，並無認真學習過普通話。中學裡既沒有學過，大學時期因為普通話課程異常沉悶，加上薯仔亦無語言天份，所以亦在學習中途放棄了。

所以薯仔既普通話，我諗同好多香港人一樣，就係淨係識將個"我"字讀成"喎"字就算鬼數。講得最多普通話既時候，除左薯仔試過係上海住過半個月外，就係平日同朋友扮外勞性工作者傾計，一句句"lao sai"，屍胡屍服呀"。。。

不過出左黎做野後，又會發覺，原來普通話都係不可或缺。

薯仔份工，除左應付一堆鬼佬外，原來亦要應(對)付一班大陸客，只不過大陸客既比例比較少(亦都算係好彩)。係好多時，唔係面對面講野，要用電話去解決問題時，普通話就絕對絕對咁重要。

亦係呢個時候先明白，原來以家既打工仔，見工時，識普通話已經係一個共識，正如佢唔會問你你識唔識廣東話一樣。佢地會認為，你係中國人，你唔識同中國人溝通，我請你返黎做乜？

唔好以為你做鬼佬公司就相安無事。當你老細，又或者高層，都唔識得講普通話既時候，但係無啦啦又有一個大陸人要應付，如果你係呢個危急關頭唔伸出援手，淨係識得企係一邊傻笑，又或者你上頭叫你去頂你嘗試去卸膊既時候，佢凌厲既目光已經明示比你睇，你既仕途都唔慌好得去邊。

薯仔其實一年只會同四五個大陸客講野，有d會駐係香港，有d係遙遠既北方。係香港，又或者係經常同香港人講野既大陸客，其實好多都幾好人。雖然我成日都講到自己唔知講乜野，條俐lur到打棘，講到面紅耳赤，個腦要比平時行快三倍去了解對方講乜野，嘗試半聽半估佢既意思，到最後我諗大家都唔知大家想點，但係大家再講下講下通常都會和氣收場，起碼會come到一個共識。

但係打返去遙遠既北方，就大檸樂。薯仔試過一次，因為寄DHL寄失在，加上對方同我地接觸開既人辭左職，薯仔就比上頭吩咐落，要同對方交待，又要同佢講以家應該有乜野應變辦法。薯仔好努力，但係講黎講去，佢聽唔明我講乜之餘，我又唔知佢想點，淨係識得粗聲粗氣咁小返我轉頭。

佢係小你，你又可以點？一黎佢係客，二黎你又係小職員，無路可逃，比人小完，你唯有諗辦法去安慰自己，之後再硬著頭皮打多次過去，講多次，"呢姣，喎是帶嫖XXX。。。。"，總之比人小極都要去到完成任務為止。

每次講一個普通話既電話，講兩個字，仲辛苦過我做兩個鐘數獨，唔好再計坐係身邊既同事既竊笑。

有時你留個CONTACT比D客，佢又真係夠膽打黎，因為你毫無準備，你又要搞一大輪先知佢係邊個，過程中仲要千萬唔好得失佢地，否則佢地嬲嬲地搵封信上既另一個CONTACT(好大可能係我上頭啦即係)，咁我仲大鑊。

所以話，對住大陸客，幾大既壓力都有。亦有言道：

"唔識英文，你唔會搵到一份好工。
唔識普通話，搵到好工你都無用。"

係香港地，身邊既朋友想學外語時，我通常都會話，"你英文得唔得先？得，你普通話又掂唔掂？未學好呢兩樣，千祈唔好再學其他!"

點解要學英文？

朋友尋日突然同我講，"喂，你覺唔覺香港以家突然間多左好多鬼佬，仲要係ok後生既？"

薯仔平時返到公司就實"撞鬼"架啦，加上放工放lunch出去食飯兜口兜面都係鬼佬/婆，又無乜點樣留意過數量既問題。

反而，薯仔留意到，以家係香港好多時係唔講英文唔得!

試過同一班同事落bar，我估唔到成間bar搵一個侍應識講廣東話既都無。要留意既係間bar並唔係身處蘇豪等位置，而只係身處於我地一般香港人心目中既舊區。

當時好彩薯仔係企係人群之後，否則以我既英文，加上唔識得bar既規矩，唔俾人笑都實比人覺得係鄉下仔!

咁可能，你話係bar，可能佢地一開就係比外藉人士去，咁請一堆母語係英文既姐姐都唔出奇。

但係薯仔又試過同朋友去睇戲，係去新開既amc pp。我想買包爆谷，都係要講英文! 個姐姐聽見我講中文好似呆晒。原來係一間大部份都係香港人去既戲院，聽到中文似係一件驚訝既事(薯仔又係衰，無望清錯姐姐既樣，望清楚應該估到佢係外藉人士，只係佢又黑頭髮黑眼珠)。。 。。搞到薯仔要即刻轉返個tone，一本正經咁。。。"hmm。。sorry，a medium popcorn please。。"

更加有一次，同朋友行開海港城，因為肚餓，又唔想食貴野，入去惠康想買件donut食下je。。見一個嬸嬸(呢次係黑頭髮啡色皮膚，佢背住我我望唔到佢個樣)係麵包檔果度執拾緊，咁我咪叫佢幫我同我朋友夾兩件包，出個bar code去比錢囉，點知佢都係"what~~？"

生活係中環，返工英文當然重要啦，除左經常要打電話去新加坡等地方聽佢地"小孩不笨"式既英文，仲有公司高層過半都係鬼佬/婆，出信等當然都係要英文，可以話英文既程度決定薯仔既仕途。英文差d，都會比人吋，尤其係一d吋吋貢既鬼佬高層。

英文對返工重要，對生活亦都係重要(除左以上既例子，仲有除非你一班人去starbuck要樣衰衰咁講水蛇春咁長既中文去買一杯咖啡，落bar叫杯野飲都除時唔知果杯係乜野黎。。。)，咁試問今時今日既香港人，尤其係中環人，英文又點可以唔好？

至於話普通話對於薯仔呢d低級職員既重要性。。。下篇再講。

愛情與麵包

唔係個個都好似徐子淇(之後睇報導話，原來係lse first hon畢業，真係又靚女又勁!)咁，搵到個心目中所愛，而佢又係勁有錢既老公。愛情同麵包，薯仔睇咁多愛情故事，以為香港人，尤其係似係薯仔咁既年紀既人，一定唔會諗麵包呢個issue住。但係原來，唔係架。

薯仔有個好朋友Ｗ，佢話比薯仔聽一個故事。

話說呢位朋友Ｗ，有一個好好既女朋友，大家相識已經，話晒都有四五六年，加上朋友Ｗ又係一個難得既專一男仔，一心只係諗住返工搵錢結婚生仔（可能物以類聚，薯仔身邊既人都比較單純）。

朋友Ｗ係本港某一大學畢業後，雖然大公司唔請，但係都叫做係一間Firm返工，假假地都係專業人士。返工既地方唔係中環甲級寫字樓，但亦未淪落至如長沙灣等舊區。

初畢業人工唔高近乎係定律（唔好計醫生律師投資銀行等等搶高工資既工，其實大部份大學畢業生一出黎係無過萬一個月），不過朋友Ｔ濟遇唔好，入到一間較無良既細Firm，做左一年，近乎原地踏步。但係朋友Ｗ依然好錫佢女朋友，係佢身上唔會計較錢呢個問題，好盡力咁為佢慶祝每一個紀念日。

但係衰在，女仔之間實在係無秘密。朋友Ｗ有日同我講，話佢聽到，佢女朋友既一位朋友，問佢女朋友有無考慮過將來！

究竟點先有將來？一畢業出黎年薪六十萬再加花紅？

朋友Ｗ聽完後，據個表情好似講緊佢無乜感覺。一個人出黎搵幾多錢，好多時唔係由佢自己控制到。能力所限，又唔係搵朝唔得晚，份工都叫做有前途丫，咁都唔滿意既話，佢都無辦法。

不過，我聽完都覺得幾心ＵＰ。。。

１。點解以家女仔會咁勢利？係，如果朋友Ｗ一世都係打呢份工，人工當然唔太高，但係即使老婆唔做野，都未至於要申請公屋丫？大不了咪排居屋！但係點解咁都要比人話？

２。拍拖，從來都唔係兩個人既事。或者朋友Ｗ同佢女朋友可以當無聽過，但係個心就從此會有一條刺。

３。”愛得太遲”話男人掛住搵錢會忽略周圍既事物。咁唔掛住搵錢，周圍既事物比你望住，又有何用？

４。兩個人起埋一齊，愛情唔會係一切。

唔該各位香港人（尤其係女人），在你講人，挑剔人地既缺點時，要顧及對方感受，諗下自己既另一半點樣又窮又有臭弧/爛口/大意/唔錫你/小男人/嫖賭飲吹/xxxxxxx!!!!要明白到，香港無幾多個李家誠架！(咁又唔代表李家誠無以上缺點喎，我又唔知，不過有咁多錢就應該乜野缺點都遮到既~)

失戀

從網上剛知道，同事ｃ失戀了。

同事ｃ係薯仔一位好重要既朋友，但可惜同事ｃ太鐘意講野，甚至係我背後講我點點點，亦講比一個以是非做人情既女人聽。當然呢個女人會四散，甚至乎講比我聽。

關係漸漸疏遠，加上同事ｃ亦已離職，大家都無再點接觸。

薯仔當日初入行，乜野都唔知，自然得罪人多稱呼人少，加上仲未分到原來返工，尤其係中環工，同返學原來係有好大分別。同事k呢個時候既出現，作為一個朋友，佢係幫我融合左工作既生活好多。

曾經係公司裡面最好既朋友，喜怒哀樂大家都會一齊分享下。我亦都覺得，無左同事k，我可能好早已經覺得中環呢份工係非人生活，已經辭職唔撈。

同事ｃ，在薯仔心目中，係一個好好既男朋友。我只前未見過一個男仔可以對佢自己女朋友咁忠誠，處處關懷，淨係每日從不間斷咁早午晚電話已經係難得，加上極有傳統觀念，生兒育女養妻活兒等等佢都琅琅上口，可能唯一既缺點係少爺脾氣大。

不過以家既女仔所求，亦係難講。薯仔見過唔少男女分手，唔再係乜野不忠，第三者，甚至乎無錢無安全感之類，而係個女仔會同男仔講。。。。。

你太愛我喇，我好大壓力，不如分開下。

其實講咁多做乜，你唔愛佢，佢做乜野都係篤眼篤鼻。無左愛情，就好似一個肚唔再餓既人一樣，你或者會掛住堆美食，但係你唔會再想食落肚。

我唔知亦都唔想估同事ｃ究竟點解會分手，不過一場同事，希望佢可以快ｄ搵到另一半。

中環價值

薯仔返工返左無幾耐，講起日常事時，比個朋友話中環價值教壞人。

探討呢件事時，先要問自己，乜野叫做中環價值？

薯仔唔太清楚，畢竟薯仔只係生活係中環開始左一段短時間，身邊既朋友亦都唔算係好"中環"既人。

只係比之前，薯仔落bar去clubbing既時候多左，食飯貴左，買衫貴左。。。總括黎講，生活得係似sex and the city既人多左，亦都係"物質主義"左。

生活在中環，本來薯仔唔太鐘意飲酒，以家已經覺得無所謂。食飯，原本薯仔自己既標準係要三十蚊左右一餐lunch，以家只要六十蚊樓下都唔會出聲。買衫，除左某幾大連鎖店(當然唔係3b1g，即係baleno，bossini，blue star，giordano)，亦都唔會再睇其他既衫，因為著出黎既話實在係"相形見拙"。總無可能見到其他同年紀既同事斯斯文文既時候，自己仲著住件粉紅色既mk衫麻。

--------------------------------------------------

不過點"物質主義"都好，landmark開既three-sixty真係搵笨賊。 。。。果個foodcourt真係一試難忘，要明白乜野叫做"中環lunch premium"，three-sixty完全可以話你知。

領匯

近排工作關係，睇新聞既時間少左，但係都留意到原來領匯既人又再嘈過。

由當年政府推領匯上市既時候，加租逼遷重組既野其實應該全部都預左。

歷來政府要推阿公既野去上市，最想做既野就係改善管理質素，唔通真係驚房委破產咩。房委破產，唔通政府又真係唔撥錢落去起公屋比人住？

薯仔開頭估咁領匯上市實會與到好大阻力，話晒公屋商場既廉價租金已經當左係公屋福利既一部份。無咁平既租，果堆專賣平野例如幾十蚊對既皮鞋，廿蚊件衫既小本經營又點樣捱？

但係政府，同埋一d親政府既傳媒又好勁，可以將反對領匯上市明明係阻止官商勾結，政府剝削窮人福利既"正義行動"，搞到成全香港大部份人都覺得係阻人發達既騙局，政棍既無恥例證。

當年搞掂晒可以上市時，薯仔訓身借錢去抽，甚至乎叫一班無乜錢既死黨，傾家蕩產咁抽(薯仔唔鐘意俾貼士，但係呢次太正)。無他，以香港地產既價值，對領匯既估值當然嚴重偏低，只要叫一班唔係低能既人去管，逐漸將呢堆舖位貼近市場租金就實掂啦。嘿，驚有社會壓力？咁樣都上得市，過左海仲洗驚你地班弱勢社群？

以家既香港政府係唔會重視班窮人，大家唔好發夢。

可惜既係，薯仔錢唔多，點樣借，做孖展，用盡積蓄既錢都係有限，身邊一眾朋友對股票又無興趣，睇住呢隻薯仔認為係近年最正既ipo賺唔盡，加上因為借錢太多，壓力大，第一日就已經放走晒。

言歸正傳，以家班人點喊都無用，領匯上市，基金經理有影響力已經係事實，要貼近市場租金都係事實。

要怨既，就怨當年點解唔企晒出黎撐鄭經漢，廬婆婆，竟然被當年(其實都係05年)既傳媒影響，睇唔到真相。

而真係有出黎撐過又衰左既，薯仔只有安慰地講句，身為中國既無錢人，你身處係香港已經算好喇。

weekday

認真去寫第一篇。

薯仔話得自己係一間大公司入面做，而係香港叫得做大公司既大部份都會係中環插一支旗。薯仔就係呢支旗裡面既其中一員。

我唔知點解咁多人會咁鐘意或者夢想係中環返工，對我黎講，中環只係一個返工塞車，食飯好貴，starbucks 同pacific coffee多過7仔既地方。

日日返工唔係遲到就係就黎遲到，塞車當然係一個因素。可以話，係中環，點解唔搭地鐵，搭地鐵唔係會準時？人就係咁犯賤，每日搭巴士都會希望會有一個位，可以坐低，係個咁逼既位入面盡量爭取睡眠。

有一日，我特登專心望下，係上層巴士入面，起碼一半人係訓緊覺或者逼自己訓覺。

訓呢短短半粒鐘係唔係精神d？當然唔係，不過，訓多少少，等自己返工時覺得眼訓，就唔會怨自己點解唔盡量訓多d。

好彩有位坐又準時返到公司，又要好好地咁諗下今日返到黎要點算(唔好彩遲到當然要左閃右避)。太多野做要ot返工時間想玩陣email都唔得固然唔開心，不過無野做個人都唔會開心。皆因無野做，代表你自己做野有問題，即係你既表現有問題，亦即係你既人工都會有問題。。。

舊時既人話，只要努力工作，機會總會來臨。但係實情係，係公司入面，工作表現當然重要但絕對唔係決定性。有時唔係既工作既質素問題，好多野更加重要。不過遲d再講，先講工作既事。

有時，即使係有野做，工作量適中，都唔代表會開心。

做錯野人地會鬧，唔做錯野，又要保持良好態度笑面迎人，否則比人話無禮貌。即使笑面迎人亦未必係好，笑得太多會比人話假，又話笑騎騎放毒蛇。唔笑，又話同同事關係差。要保持一個中間點係需要道行，而呢個道行我以家都未有，尤其對老細時，應該講乜野/點講/乜野態度更加係令人難以捉摸。

比人鬧既時候，個樣要點變更加係高難度。笑既話比人話你唔專心，扁嘴比人睇到又樣衰，望住佢有eye contact果陣個人又唔開心，唔望又話你唔聽佢講野，最緊要係要係自己勁嬲既時候仲要恭恭敬敬咁認同對方既說話，自己做錯都還好，你覺得對既時候反擊會比人話你囂張，唔反擊又不停咁食死貓，食得多佢以為你好恰就重要恰多你幾錢重，最後有功佢領有鑊就你咩。。。。

好辛苦咁捱到放lunch，一係逼到死一係貴到死，唔逼又唔貴既就排隊排到死。唔逼唔貴又有位坐既，一定係好難食。

食完餐飯，喪屍咁行返公司。飯氣攻心，三魂唔見七魄，又要重複朝頭早做既事。

咁既心情去到放工，個人都好似打完一場仗。返到屋企食埋飯個人都想死。

望返中環工既朋友，應該諗清楚先。

今日係另一個新blog開張既日子。小弟船頭驚鬼船尾驚賊，希望係一個無人知我係邊個既地方，可以真正咁暢所欲言。

大家可以叫我薯仔。

叫自己做薯仔，無特別意思，皆因小弟我並無過人之處，如現在總結人生，無一方面會突出過人。現職一間大公司裡面一個小薯仔(small potato)，行先就死先，比人指做乜就乜。

堅信工作時遊戲，遊戲時發癲呢個不變真理。